Siempre pasa igual, cuando paez que tolos trabayos y esfuercios de más de 40 años van a frutiar, que l’algame d’esi derechu tan suañáu y tan necesariu pa la salvación de la nuestra llingua ta mui cerca, que yá llega la Oficialidá, desátase una campaña nalgunos medios de comunicación, asturianos pero non sólo, a la escontra de too ello. Ésti ye un d’esos momentos nos qu’arrecia la truena antiasturiana (porque tou bon asturianu tendría que defender lo suyo con uñes y dientes) y dende diverses columnes periodístiques xueguen al pin-pan-pum cola nuestra llingua tradicional.
Empleguen pa ello los más pintorescos argumentos, y asina hai qu’oyer que “el bable nun lo fala naide”, o que “van a obligar a tolos asturianos a falalo”, y otres mentires que, por repitíes, pretenden facer pasar por verdaes. Hai dos temes sobre too nos que, los disparos de los francotiradores, afinen la puntería. Un ye que los que defendemos la oficialidá nun queremos facer un Referendum pa que la xente decida. Quedo plasmáu. Resulta que ta negándose-yos a los catalanes la posibilidá de facer un Referendum nun tema de vital importancia, como ye’l separase o non d’España, alegando que nun sería constitucional, y llueu pretenden facelo d’una cosa qu’en nenguna comunidá se fizo a la hora declarar la oficialidá de la so llingua propia. Pa eso sí pue facese una consulta popular, pa lo otro non. Y ye que, amás, esiste un mou mui claru de conocer la posición de los asturianos alrodiu de la so llingua: La macroencuesta realizada pol reputadísimu equipu del Euskobarómetro, que por tercer vez nestos caberos años amuesa qu’una sustancial mayoría de los asturianos defenden la oficialidá de la llingua. Claro qu’esto nun-yos val, seguro que tará manipulao, etc. etc.
L’otru tema son los ataques al representante parllamentariu de Foro, Adrian Pumares, pa que vote a la escontra nuna posible votación parllamentaria. El votu del señor Pumares ye decisivu pal resultáu d’esa votación, pero tan decisivos son el restu de los votos favorables del restu de los partíos políticos ellí representaos. Por eso, dicir que Pumares namás representa un porcentaxe mui baxu de votos de los asturianos, y que nun debería falar en nome de toos ye mentir a sabiendes. El Parllamentu Asturianu ye la másima representación del pueblu d’Asturies, y una mayoría nesa cámara supón una mayoría del conxuntu de los asturianos. El votu de Pumares, xunto colos demás votos necesarios p’algamar esa mayoría, representen al pueblu asturianu y eso ye la esencia mesma de la democracia que dalgunos quieren romper con mentires. Que digan, pues, lo que-yos pete a esos que glayen a la escontra l’asturianu, pero les coses son como son. Lo malo ye que se trata de xente influyente na sociedá a traviés de los sos medios de comunicación. Habrá que siguir desenmazcarándolos.
