La editorial Anagrama, onde se publica l’últimu llibru de Roberto Saviano, llámala novela y, poro, nun seré yo quién-y lleve la contraria. Pero a min paezme más un ensayu qu’una novela, eso sí, un ensayu que se llee como la meyor de les noveles: apasionadamente. Porque nella cuéntase a traviés de 580 páxines la verdadera cara de la mafia. O por llamala col llinguaxe verdaderu, la «Cosa Nostra», eso de mafia ye más bien inventu de la prensa, tal y como se nos diz nel propiu testu.
L’oxetu del llibru ye cuntar la vida y la muerte del xuez Giovanni Falcone, l’home que punxo a la mafia (vamos emplegar el términu vulgar) escontra les cuerdes y a munchos de los sos «capos» ente rexes. Pero esi oxetu resulta mui pequeñu al llau de tolo que se cuenta nesta gran novela del autor de «Gomorra», esi llibru tornáu a más de cincuenta paises y que vendió diez millones d’exemplares. Por mor d’ello, l’autor napolitanu tien de vivir dende entós con escolta pues ta amenazáu de muerte.
Lo primero dicir que «Los valientes están solos» nun ye nengún «best seller». Nada tien que ver con esos populares llibros publicaos pa vender y que, cuasi siempre tán escritos dende’l puntu de vista de los mafiosos: «Sopranos», «Corleones»… que, al final, terminen hasta cayéndote simpáticos. La novela de Saviano nun da tregua a los «malos», que nun sólo son los capos y los sos esbirros, sinón tamién esa parte del Estáu que por complicidá o cobardía, collaboró a que los fechos asocedieren como asocedieron: con un Estáu de rodiyes ante la mafia, y una cadarma carcomida pola corrupción y el crimen.
Pero Falcone nun tuvo solu nesta xera. Otros pocos funcionarios del Estáu y otra xente de bona voluntá llogró desmontar el tingláu de la Cosa Nostra y llevalos a un «macroxuiciu», anque col preciu mui caru de, en munchos casos, dexar la vida propia pel camín. Un d’ellos el propiu xuez Falcone. Porque la mafia nun yera como creyíen, o dicíen creyer, políticos, policies y carabineros, una cosa d’ «aldeanos», de bandes de pistoleros que se facíen fuertes nun o otru sitiu, sinón una cosa organizada, xerarquizada y planificada qu’había que desmontar del únicu mou posible: siguiendo’l camín del dineru. Analizando bancos y cuentes bancaries. Percorriendo les rutes de la droga, les conexones ente continentes, América, Italia… Esi fue’l gran llabor de xente como Rocco Chinnici, Paolo Borsellino, Giuseppe Ayala y el propiu Giovanni Falcone: Fiscales, xueces, policíes, periodistes y, casu raru, inclusive dalgún políticu, como’l ministru Claudio Martelli, que formaron una «gran minoría» en llucha, nun sólo escontra los mafiosos, sinón tamién escontra los que teníen que tar del otru llau, del de la xusticia.
Un llibru hermosu y murniu, enllenu de valientes y cobardes, de crímenes abegosos y d’actos heróicos que se llee con emoción y que tien una calidá humana y lliteraria como va munchu tiempu que nun lleía. Y too ello ensin cayer en fáciles amariellismos, siempre axustáu a los fechos y a los llugares que, como se nos diz al principiu, son toos ellos reales. Norabona a Roberto Saviano por un testimoniu de tantu valir como ésti qu’acaba de dexanos. Grandemente recomendable la so llectura.
