Llámolu asina, ensin nengún desdoru, pa estremalu del otru, del gran poeta yá fallecíu que dexó tres de sí una obra múltiple y prestosa. Esti otru Ángel González nun ye poeta, y tengo reparos pa denomalu demócrata.
Y ye que, a estes altures de la película, llevamos yá munchos meses esperando del portavoz de Izquierda Xunida un detalle de paisano. Un reconocer lo que se fizo mal, asumilo y facer mutis pel foru ensin más aspavientos nin cites a “la Historia me absolverá” como un Fidel Castro de pacotilla. Porque, en casos como ésti, val esi dichu de que l’infiernu ta empedráu de bones intenciones.
Nun seré yo quien xulgue les bones intenciones d’esti otru Ángel González. Ye más, voi concede-y el beneficiu de la dulda y suponer que sí, que les intenciones yeren bones. Tratábase d’homenaxear a los muertos de la república, a eses persones colos mesmos drechos que los otros muertos, los del franquismu, que fueron enterraos poles sos families con cura y molacín, mentanto que los del bandu del gobiernu llexítimu andaben (anden) sapozaos en foses comunes o llugares anónimos. Recordar eso ye de xusticia y cualquier demócrata apautaríase colo de poner una llábana o un monolitu señalando esos llugares.
Pero dalgo, que repito, ye de xusticia, hai que lo facer bien. Respetando los tiempos y les formalidaes que
correspuendan y cumpliendo les lleis qu’establecen les mesmes oportunidaes a tolos que quieran concursar pa facer esos monolitos, en pasando d’una cantidá de perres estipulada. Y eso nun tien que ver cola bona voluntá del políticu de turnu. Ye dalgo qu’hai que cumplir. Porque nesti casu, igual la causa ye bona, pero n’otros casos podía nun ser tan bona o dafechamente mala. La democracia tien unos calces dacuando estrenchos, que a toos nos prestaría que fueren más anchos y más rápidos, pero les coses son como son y hai que les aceutar. Cuántes vegaes, delantre un fechu abegosu, causáu por dalgún desalmáu, nun tuvimos la tentación de tomanos la xusticia pola nuestra mano y dexar de llau lleis y escrupulos pa da-y un escarmientu exemplar. Pero hai qu’atalantar que, en democracia (otra cosa ye nuna dictadura) les lleis hai que les respetar, y si nun gusten lluchar por cambiales, pero nunca, y menos un dirixente políticu, saltáseles a la torera. Poro, yá nel mesmu momento de la imputación don Ánxel González tuvo que reflexonar, y dende llueu, cuando yá hai una condena xudicial nun tien otru camín que dimitir y colar pa casa. Llueu que reclame si hai llugar a ello, pero la conducta tien de ser exemplar, ensin apelaciones a populismos, supuestos méritos personales o babayaes varies.
Dos coses pa finar: la primera que ye cierto que, una vuelta más, dientro d’Izquierda Xunida hai corrientes, tendencies, grupos de presión y lobbies. Asina-yos lluz el pelo, siempres con divisiones y disparando escontra l’enemigu de dientro. Nesti casu tamién. Y otra: diz don Ángel González que lleva nesto de la política una carrapotada d’años y ponlo como exemplu positivu. Nun sé. Igual lo malo ye llevar tantos años faciendo d’ello una profesión. Lleo esti día que se xubila d’una llamada «Fundación del Osu» o dalgo asina, Carlos Zapico. Esti paisano formó parte del primer ayuntamientu de la democracia y dende entós, tuvo pasando d’unos puestos a otros, promovíu pol PSOE, ensin trabayar n’otra cosa fuera de la política que-y dio de comer. Nun ye l’únicu. Cuando los “indignaos” piden un cambiu na forma de facer política igual tamién falen d’eso.
