A cualquiera que-y dea por entrar nun apartáu d’esti blogue, na parte arriba, que pon «Biografía» (la verdá, nun ye nada interesante) verá que pongo que la mio verdaera vocación yera la de futbolista. Nun puedo dicir que soi un futbolista frustráu porque llegué a xugar en dos grandes equipos modestos de Xixón: La Braña y el Ciares. Y nun hai contradición nos términos «grandes» y «modestos», porque munches veces esos llamaos modestos podríen enseñar munches coses a los llamaos grandes: dignidá, trabayu, consecuencia… Nun digamos yá les persones que con ellos collaboren: direutivos, entrenadores, saqueros o baloneros… Xente que, ensin otra compensación que la del so propiu esfuerciu, regalen el so tiempu y el so trabayu pa qu’un piñu de rapazos y el color d’un escudu y unes camisetes sigan alantre como alternativa a drogues y botellones. Un mundu que ta mui bien recoyíu, por exemplu, na prestosa novela de Xulio Berros «Fuera de xuegu» que va tiempu tuvi’l placer de presenta-y.
L’otru día falaba Luis Enrique, actual entrenador del Barcelona, del so arguyu por tener xugao en La Braña, y esti que
firma pue dicir lo mesmo, y sobre too nel U.C. Ciares col que cumplió’l suañu de xugar n’El Molinón y marcar dos goles. Pero bono, nun quería poneme señaldosu nin rompegüevos sinón recoyer equí la xesta d’esi Club de los mios amores que, col presupuestu más pequeñu de la Tercera División, tuvo a piques de xubir a Segunda B onde ta, por exemplu, el Real Uviéu. A la fin nun pudo ser, pesie a que «morrieron matando». En cualquier casu, y anque muncha xente nun lo comparta, lo principal nun fue esi destacáu papel, sinón el mou d’atalantar el fútbol. Trabayando la base de xugadores, faciendo les coses dende y con la xente del barriu, promoviendo coses alternatives como un Concursu de Cuentos de Fútbol del que tuvi l’honor de ser xuráu (xunto con Antón García y Xandru Fernández), emplegando la llingua asturiana en publicidá y comunicaos, y un garapiellu de coses más que, de xemes en cuando, salen nos papeles (menos de lo que mereceríen). Norabona, pues, a esti modestu exemplar que cumplió na mio vida un papel importante, y que de xuro va a siguir faciéndolo pa otros munchos rapazos xixoneses que van ser felices xugando nun campu que pon escrito fuera: «Esto ye La Cruz». Qu’asina siga siendo, sobre too pa los contrarios.
(Na semeya la delantera del U.C. Ciares xuvenil, nel añu 1961: José Luis, Rodolfo, Oliva, Raul y Cañedo con «camisoles» de botones)
