Los problemes surdíos na Fundación Niemeyer, al respective de les sos cuentes, fue un de los primeros «panchos» colos qu’hubo de lidiar el grupu de Foro Asturies en llegando al gobiernu asturianu, tres ganar les eleiciones. Más concretamente, el «ministrín» de Cultura y otres coses, el recién nomáu Emilio Marcos Vallaure. El baturiciu que s’entamó a la so costa, entovía resuena en tolos oyíos, polo menos nos míos que nun tán tapaos por nengún partidismu políticu. El fechu de pidir cuentas a la Fundación por nun tar el tema de les perres mui claru, llevantó «ronches» nel restu los partíos políticos, sobremanera nel PSOE, que punxeron el glayíu en cielu acusando al conseyeru, y con él al gobiernín, y con él a tol partíu, na menos que de querer «cargase» la cultura n’Asturies y de querer fundir a una villa como Avilés porque, de xuro que-y teníen dalguna manía escontra ella.
Del «ruxe-ruxe», la cosa pasó a movilizar a la ciudadanía, a la que con mui cenciellos eslóganes, se sacó a la cai, encabezaos per un grupu d’hosteleros, pa evitar la ruina y abandonu d’Avilés per parte del gobiernu asturianu. Amás, anicióse otra campaña esterior, na qu’intervinieron conspicuos «homes de la cultura» zarrando files colos xestores del Niemeyer y acusando al Conseyeru y Cía., d’ignorantes, aldeanos y, ellos tamién, de querer cargase la cultura
n’Asturies. Nun recuerdo mui bien los nomes, y dame pereza tirar d’hemeroteca, pero creo que, ente otros, tuvieron el mio almiráu Serrat y el so amigu de xires Sabina. Pela so parte el señor Grueso, mandamás del asuntu, y la señora alcaldesa d’Avilés, desbarraron tolo que quixeron como víctimes del «atropeyu», abúltame que con pleitos xudiciales p’ente medies.
Yo d’aquella escribí tamién dalgo, nel sen de que, onde hai perres públiques, les cuentes tienen que tar pernidies, y que nun tien mal que paecer a naide que s’esixa un rigurosu control contable, sabiendo, como se sabía, que yá había coses mui poco clares.
Agora la prensa, parte de la cual tamién s’allinió a les tesis del atentáu escontra la cultura n’Asturies, y a la vista de les evidencies de numberoses irregularidaes, escesos, ocultaciones y demás «chanchullos» pescanciaos, pidi les cabeces de los responsables, sofitada peles declaraciones «ex-temporanees» (o seya, fuera de tiempu) d’aquellos partíos que, nel so día, criticaron lo que güei aplauden. Eso sí, ensin reconocer que Foro tenía razón, y qu’ellos yeren los enquivocaos, de bona o mala fé, qu’esi ye otru cantar. Al tiempu, los que fueren cómplices del «desaguisáu», por fechos o por omisiones, agora dicen qu’ellos nun sabíen nada y que fueron engañaos «na so bona fé». Entós, ¿pa qué acudíen a les xuntes del patronatu? Y quiero pensar que nun cobraben comisiones pela asistencia, porque si fuere asina ya teníen que tar devolviéndoles.
A mi, que nun tengo al señor Cascos por «santu de la mio devoción» (ni siquier como santu), criticóseme en dellos «foros» «acusándome» de poneme de parte del otru FORO porque, díxeronme dalgunos, utilizábense frases míes (supongo que fuera de contestu) en defensa de les tesis «foristes». A estes altures de la vida, eso ye dalgo que me trai dafechamente ensin cuidáu. Y ye que yo entiendo que na Política, cuando una cosa ye bona toos la debíen apoyar, y cuando ye mala toos la debíen refugar. Pero ya sabemos que cuenta más el deterioru del contrariu y la so «eliminación», anque seya a costa de que la ciudadanía salga perxudicada, y asina nos lluz el pelo. Cuido qu’agora dalgunos volverán a dicir: «Mira cómo se-y ve’l plumeru a esi Oliva. Yá dixi yo que yera de Foro». Probes, qué enquivocaos tán…
