close
Nun toles manifestaciones son iguales

Nun toles manifestaciones son iguales

2012-10-04406Visitas

Pese a que dalgunos políticos del PP quieren «regular» (¡cuidáu col términu!) el drechu de manifestación, a mi abúltame que ye mui sano que, ensin quitar lexitimidá a los representantes que nosotros mesmos escoyimos pal parllamentu, podamos espresar na cai aquello que nos duel, que nos paez que ta mal o que nos emburria a situaciones de mayor marxinalidá. Entiendo que en Madrid, trubiecu de munchísimes «manis». tengan problemes col tráficu o dalgunos comerciantes protesten (otros, en cambiu, benefíciense cola presencia nes cais de tanta xente). Pero eso, en tou casu, son servidumes de la capitalidá que tamién nos obliga, a otros munchos, a tener que resolver ellí dellos problemes.

Pero lo malo de tantes «manis» como se vienen faciendo  ye qu’un pierde la capacidá d’estremar unes d’otres. De clasificar, según la importancia que tienen, a unes y a otres. Toes tienen les sos razones y, poro, toes elles son igual d’importantes. Pero nun debiera ser así, porque hai dalgunes situaciones que requeriríen d’una mayor atención, y pasamos p’enriba d’elles como una protesta más.

A esti respeutu, a mi llamóme muncho l’atención y, ensin embargu pasó cuasi desapercibía, la manifestación de les organizaciones que lluchen escontra la discapacidá. Non esautamente escontra la discapacidá, que ye un fechu de la naturaleza o provocáu por un accidente, sinón escontra la marxinación de los discapacitaos, la falta d’axudes pa los que los cuiden y la imposibilidá de tener una vida un poco menos frustrante de la que’l destín paez que-yos ufierta. Nun pue ser que’l Principáu adeude a estos coleutivos más de 4 millones d’euros. Y yá nun ye sólo qu’un gobiernu socialista quitare de los Presupuestos más d’un 70% del dineru destináu a los discapacitaos, ye que se-yos tán debiendo unos atrasos del too inxustificables. Too ello, l’ esbarrumbamientu de los programes, los retrasos nos pagos, la deuda de l’Alministración y el peligru de quiebra na atención a los discapacitaos y les sos families, son fechos qu’una sociedá civilizada nun puede permitir. Nun podemos permitir.

«De los dependientes, nadie está pendiente», nos reclama una pancarta dende la cai, a onde miles de discapacitaos tuvieron que salir, coles silles de ruedes, muletes y demás instrumentos de sofitu. Y esi reclamu nun pue quedar nel olvidu. Nun podemos escaecenos d’un coleutivu fráxil, y marxináu porque seyan incapaces de quemar neumáticos o de poner barricaes nes víes del tren. Tendría que cayenos la cara de vergoña si nun conseguimos que, d’una vez per toes, s’atiendan les xustes reivindicaciones d’estos 25.000 ciudadanos d’Asturies que deberíen tener los sos drechos bien abellugaos. Porque nun sólo falamos de persones, sinón de persones desprotexíes. A mi, viendo les imáxenes, párteseme’l corazón.