LA VOZ QUE CLAMIA NEL DESIERTU.- Tien 82 años pero naide lo diría. La so voz suena moza, xoven, y alborota’l piteru cada vuelta que la dexa falar. Llámase Hans Küng y ye compatriota y cuasi contemporaníu de Joseph Ratzinger, pero nun hai color. Mentanto qu’ésti cada vuelta ta más vieyu, más repititivu, más conservador, paez que Küng remocica colos años, y los sos plantegamientos de lo que debiere ser la verdadera Ilesia suenen siempre a nuevos. Agora, a los cinco años del pontificáu de Benedicto/Ratzinger, Küng asoleya una carta empobinada «a los obispos católicos de tol mundu». Nun tien esperdiciu. La Ilesia del so compatriota ye la de «les oportunidaes perdíes»: Nulu entendimientu colos xudíos. Nulu entendimientu colos musulmanes. Nula reconciliación colos pueblos nativos de Latinoamérica. Nulu sofitu a los pueblos africanos na superpoblación, aprobando medíes anticonceptives y escontra’l sida, colos usu de preservativos. Alloñamientu de les ciencies modernes (evolución, célules madre…). Y cada vuelta más d’espaldes al Conciliu Vaticanu II, el del gran Xuanín XXIII. Por contra, sofitu a les tendencies más «ultras», a la misa medieval tridentina, a la eleición de cargos cada vez más reaicionarios (Secretaría d’Estáu, Congregación pa la Lliturxa…). Tapecimientu de los abusos a menores… Tou un repas a fondu de los males d’una Ilesia irreconocible a los güeyos del so Fundador. Y esti «mozu», Caderalgu de Teoloxía na Universidá de Tubinga y Presidente de Global Ethic, nun sólo critica, sinón que da soluciones. Soluciones factibles, si se quixera un cambiu de rumbu na Ilesia. Recomiendo la llectura atenta de la so Carta. Pue vese nel País.com del xueves 15/4/2010. Llamentablemente, les altes instancies pontificies nun van face-y nengún casu y, poro, va a seguir siendo «la voz que clamia nel desiertu».
NUN DEBEMOS CONSENTILO.- Va pocu tiempu, asoleyábense unes encuestes nes que se recoyía’l resultáu de que’l 
partíu UPyD y nun sé qué otru que nun conocía, teníen posibilidaes de sacar dalgún escañu n’Asturies, nes prósimes eleiciones autonómiques del añu que vien. Y decíase ellí, qu’ello sedría a costa del asturianismu políticu que, como siempres, acudiría a les mesmes desuníu y faciendo caún la guerra contra los demás. Nun fai falta que me lo diga nenguna encuesta. Toi seguru de que, si los nacionalistes asturianos siguimos trabayando de la mesma manera qu’hasta agora, vamos volver a salir «col rau ente les pates». Ye lo que mereceríemos. Entovía tamos a tiempu d’axuntar fuercies y preparar (el tiempu esnala) una alternativa política asturiana pa les prósimes eleiciones. El cómo y el cuándo nun me correspuende a min dicilo, pero somos munchos los qu’esperamos por un proyeutu seriu al que poder sofitar.
EGUNKARIA.- Agora ya nun tien igua. Depués d’unos cuantos años (demasiaos, amigos xueces, pa un tema tan importante) nos que’l periódicu escritu n’Euskera tuvo trancáu por decisión xudicial, agora resulta que ye inocente de toles culpes que se-y echaben. Y na menos que se-y echaba la de ser parte de la cadarma d’ETA. Pa ellos nun-yos valió la presunción d’inocencia. Dende que se produxo l’acusación, el periódicu dexó de publicase. ¿Y quién-y devuelve agora’l tiempu perdíu, y los llectores desapaecíos y les perres non ganaes, y’l serviciu que prestaba a la so sociedá? Hai que tener munchu cuidáu con estes coses. Zarrar la boca a los pequeños ye mui fácil, y más si s’espresen nuna llingua tamién pequeña, la del so pueblu. Habríen d’arbitrase midíes pa qu’esto nun volviere a pasar, mentanto, la única lleición que deberíen sacar esos xueces y esos partíos mayoritarios, ye que nun tolos que queremos espresanos na nuestra llingua milenaria, somos terroristes.
CABUDAÑU D’UNA DAMA.- El pasáu día 11 d’esti mes d’abril, cumplióse’l primer Cabudañu de la muerte de Nené 
Losada, la gran dama de les lletres asturianes. Con ella fuxó una de les voces más personales de la nuestra poesía. Una voz sele, cenciella, pero d’una fondura y personalidá verdaderes. El furacu que nos dexó, va a pasar tiempu en poder enllenase, porque ye verdá qu’hai xente qu’escribe bona poesía, pero quiciás nenguna cola so sinceridá y la so dulzura. Y lo malo ye que dalgunos, amás de a la poetisa, perdimos a l’amiga. Préstame agora volver a recordala:
Cartinas d’amor: Quixera ponete unas lletras/pero tas tan cerca./¿Por qué non te vas llonxe,/ bien llonxe?/Asina podría escribite/cartinas d’amor./ Díríate/cuánto te quiero/ cuanto t’añoro,/ ya nel sobre,/con lletra bien guapa,/
podría poner: Sr. D./ Pasáu algún tiempu,/ na última cartina,/ pediríate/que vinieras prontu./ Ya depués, al oídu/
pa que nadie pudiera escuitalo,/ contaríate todo/ lo que me quedóu.
