UN NUEVO ORDE INTERNACIONAL.- Cuantes más tiempu pasa, más se conoz del asesinatu de cooperantes desarmaos, pol Gobiernu d’Israel. Tres les declaraciones d’un de los activistes españoles, que dixo que l’exércitu israelí empezó a disparar dende los sos naves, y qu’enantes de xubir a bordu yá había dellos muertos, el mio almiráu Henning Mankell, que viaxaba nun de los barcos, dixo que la única arma qu’habia a bordo yera la so maquinina d’afaitar. A too esto, depués de conocer esta masacre escontra unes persones que llevaben axuda humanitaria, el númberu dos del Presidente Obama comentó qu’Israel «tenía drechu a defendese». Nun sé qué ye peor, el crime o el cinismu. Too ello tien que volver a plantexar que la Organización de les Naciones Uníes, la ONU, ye un organismu dafechamente inválidu. Mientres un pequeñu piñu de paises sigan col drechu al vetu y mientres nun puedan tomase represalies escontra aquellos paises que fenden la paz y solucionen los problemes a tiros, nun habrá manera d’entendese civilizadamente y continuará siendo la llei del más fuerte. Como nel vieyu «Oeste». Hai qu’entamar otra LLiga de les Naciones, otra Comunidá de Paises o como quiera llamase. Un nuevu orde internacional sofitáu nel respetu a los Drechos Humanos y ensin privilexos pa nengún país. Mentanto esto nun llegue, lo que tenemos agora nun val pa nada, esceuto p’amosar la impotencia de los probes frente a los ricos. Como pasó siempre.
PAISANOS O BESTIES SELVAXES.- Esti día morrió nel Natahoyu otra muyer asesinada pela so pareya. La llista
continúa. La idega de que la muyer nun ye un ser como nosotros, los homes, que nun tien drechu a ser llibre, autónoma, a facer cola so vida lo que meyor-y pete, a xuntase o a separtase talo que lo entendemos pa nosotros, esa idega, ta tan afitada, tan allancada na Historia y nel maxín de munchos paisanos, que son capaces de portase como besties selvaxes y asesinales enantes de que los dexen. «La maté porque era mía», diz el tangu. Y asina asocede con munchos paisanos que quieren siguir siendo los amos de la muyer que convive con ellos o que lo fizo nel pasáu. Paez que ye un problema d’educación, de cultura… Ensin embargu, dacuando veo comportamientos nos mozos y moces d’agora que me dan mieu. Cuidáu colos «gallitos» y los que pretenden mangoniar la forma de vistise, afatase o pensar de les mocines. Nun perdáis nunca la vuestra autonomía respeutu a ellos. En cualquier casu, dalgo debe fallar tamién nesa mal llamada «Llei de Violencia de Xéneru» pa que siga habiendo tantos asesinatos de muyeres. ¿Nun habría que se la replantexar?
AGORA YE’L MOMENTU.- Dalgunes encuestes qu’apaecen estos díes dan al Partíu Popular la mayoría absoluta 
n’Asturies, si se cellebraren Eleiciones Autonómiques agora. Y eso al marxe de que punxeren a ún o otru candidatu. Eso amuesa’l baxu nivel de confianza al que llegaron Socialistes ya Izquierda Xunida na gobernabilidá d’esti País. La xente nun quier qu’estos sigan mandando, y cambia’l votu. Pero esti ye, al mio xuiciu, un votu «de castigu», más qu’un votu ganáu pola derecha que nengún méritu fizo pa ello. Esti ye, pues, el momentu que tendría qu’aprovechar una formación nacionalista, salida d’un ampliu consensu de la xente que nos movemos nesa idega, pa presentar un proyeutu capaz d’illusionar a una parte del pueblu asturianu, suficiente como pa poder entrar nel Parllamentu. Nun vengamos llueu con lloros o llamentos. Tenemos de ser capaces de crear y dar fuelgu a esa formación porque les oportunidaes, na vida, hai que les aprovechar. Sinón, tolo que nos asoceda depués, sedrá por culpa nuestra. Yá ta bien de facer política nel chigre…
FÚTBOL Y LLITERATURA.- Invítenme los organizadores de l’Arribada d’esti añu a una mesa redonda sobre’l tema «Fútbol y Lliteratura». Agradézo-yoslo muncho porque son dos coses que me presten, pero que, hasta va mui pocu tiempu, paecíen términos antitéticos. Como eses llinies paraleles que nunca nun s’alcuentren. Los escritores refugaben el fútbol, y los futboleros fuxíen de la lliteratura. Hubo qu’esperar hasta la transición pa que, migayín a migayu, eses llinies paraleles principiaren a alcontrase. Llibros como l’antoloxía «Cuentos de fútbol», d’Alfaguara, con autores como Fulgencio Argüelles, Manuel Rivas, Javier Marías, Miguel Delibes o Julio LLamazares, ente otros; o noveles como la de Vazquez Montalbán «El delantero centro fue asesinado al atardecer», acompañen agora a dalgunos escritores sudamericanos que yá probaren esi tarrén, como Benedetti («Puntero izquierdo») o Galeano («El árbitro»). Tema, pues, interesante y d’ampliu debate. Pal que tenga interés, l’actu cellebraráse’l prósimu miércoles día 9, nel antiguu Insitutu Xovellanos de Xixón. Creo que a les 7,30. Ellí nos vemos.
