close
Olivando

Olivando

oviedo20161ALÓN A LA CAPITALIDÁ EUROPEA.- El camín de la ciudá d’Uviéu en cata d’esi títulu rellumante de «Capital Cultural Europea» fue curtiu. A les primeres de cambiu diéron-y «pasaporte». Los que presentaron la candidatura dixeron, nel momentu del actu de presentación, que quedaron mui bien, pal tiempu que tuvieron. Yo, inocentemente, entrúgome: ¿Qué ye que nun tuvieron toles ciudaes el mesmu tiempu, o ye que a dalgunes diéron-yos ventaxa respeutu a otres? Lo qu’asocedió, al mio paecer, ye que n’Asturies perdióse’l tiempu xugando a los bolos ente Xixón, Uviéu y Avilés, que si vamos xuntos o que sinón, cantando como na canción popular: «una vez que sí, otra vez que non…». Y cuando Uviéu quixo ponese a trabayar, yá yera tarde. Pero hai otros motivos pal fracasu cultural uvieín. Otres condiciones, amás del tiempu, qu’hai que valorar. El primeru ye la singularidá. Cultura nun ye sólo infraestructures (que tamién), sinón «cultura propia», diferente de la d’otros, estremada del restu del mundu. ¿Falóse dalgo de la llingua? ¿Falóse dalgo de la «cultura popular»? ¿del patrimoniu inmaterial? ¿Falóse dalgo del Reinu d’Asturies? Tenemos, na rodiada d’Uviéu, los meyores exemplos del Arte Asturianu. Pero eso nun son sólo monumentos prerrómánicos, representen la cultura propia d’un pueblu nun momentu históricu. ¿Remarcóse esa diferencialidá? Sentí falar al representante de Las Palmas, una de les ciudaes escoyíes,  falando del clima, de les playes y de la gastronomía. ¿De verdá podemos creyer que si se presentare una candidatura como ye debío, nun pudiéremos quedar finalistes? Y per otru llau, un proyeutu de «capitalidá europea» tien de tener detrás de sí a tou un pueblu. ¿Fue esi’l casu nuestru? ¿Fíciéronse esfuercios pa integrar tres el proyeutu al pueblu d’Uviéu y al pueblu asturianu? ¿Quién conocía cómo yera esi proyeutu? ¿Qu’espardimientu se-y dio? Abúltame que nengún. Resultáu: un fracasu más. Una ocasión más, perdida, de dase a conocer a nivel européu, de trayer xente, turismu, inversiones y desgravaciones fiscales…  Vamos, lo de siempre.

PRÓRROGA PAL CARBÓN ASTURIANU.- La Comunidá Europea dio un nuevu (y últimu) plazu pal pieslle de les minestrabajando-en-mina-de-carbon-1908-t7491 asturianes. Destácase’l valor de reserva autóctona del mesmu. Lleo que dalgunes organizaciones ecoloxistes protesten porque contamina. Ye verdá, contamina’l mediu ambiente. Pero abúltame que tampoco nun hai que poner les coses al revés. Primero ye la xente, y llueu’l mediu ambiente. De nada valdría un mediu ambiente purísimu y la xente morriendo de fame. Yo taría encantáu de que nel Africa pudieren comer toos, anque se contaminare un poco más. Y llueu, eso sí, en cuantes se pueda, dir camudando unes enerxíes qu’empuerquen más por otres más llimpies. Pero entovía güei munchos asturianos dependen del nuestru carbón. Lo que, al mio xuiciu, hai que facer, ye qu’eses perres que da Europa, eses axudes al carbón, nun se marafundien, y se gasten pa lo que debieren ser: reindustrializar les zones afectaes, y «reciclar» a los paisanos y a les families que viven d’ello. Porque si non, vamos siguir contaminando y, amás, nun vamos preparanos pal día en qu’eses subvenciones desapaezan dafechu. Y ta ehí, a la vuelta la esquina.

guelga-29-9LA GÜELGA DEL 29-9.- Anque ensin munchu comencimientu, asistí el día 29 pasáu a la «mani» y a la concentración nel Nauticu de Xixón de los llamaos (con razón) minoritarios. De Comisiones y UXT falaré otru día, pero con más de 600 lliberaos nun país probe como Asturies y entamando güelgues meses depués d’aprobase los decretos, nun me paez que tean mui acertaos, pero bono, esi ye otru tema. Dicía que tuve sintiendo los discursos de los «minoritarios» nel Náuticu y quiero dicir dalgo al respeutu. La xente en Xixón, y la xente n’Asturies, sobre too les clases populares, nun falen en castellanu perfinu. Falen, como muncho, nesi amestáu qu’entemez les dos llingües. Poro, sonábenme mui desafortunaes les pallabres del representante de la CGT, un tal Muñiz, que nos fartucó de «hemos estado» y «hemos venido», con un discursu dafechamente nuna llingua nun reconocible, pese a la pancarta que tenía detrás. ¿Nun habría mou de pautar coses coma esa, a la hora de facer un actu conxuntu? Porque, depués, la representante de SUATEA fízolo perbién, nuna llingua como la que falamos la mayor parte de la xente, ensin ser dafechu n’asturianu.Del restu del discursu del amigu Muñiz nun voi dicir nada, pues nun ye l’oxetu d’esti comentariu, anque venir citando a estes altures a Bakunin, abúltame un poco tresnochao. ¿Nun hai líderes más cercanos, en tiempu y llugar?

rumanosLA COMUNIDÁ EUROPEA BÁXASE LOS PANTALONES.- Pese a que la Comisaria Europea de Xusticia púnxose mui gallaspera escontra Sarkozy, cuando desanició a los xitanos rumanos de Francia, y destapó la caxa los truenos falando de lo intolerable ya illegal que yera aquello, llueu «llegó Paco cola rebaxa» y la cosa quedó en nada. Una vuelta más , la Comunidá Europea báxase los pantalones delantre los «grandonos» europeos: Francia, Alemania, Reinu Xuníu. Mal exemplu pa una institución que quier pasar por un modelu d’integración y democracia. Mentanto, los probes, los marxinaos, los distintos, tienen que se buscar la vida pese a qu’ellos tamién son europeos y tamién son comunitarios. Los capitales tienen más llibertá de movimientu que nunca. Les persones son otra cosa.