LOS «INDIGNAOS» TIENEN RAZÓN.- Cada vuelta, la realidá va dando la razón a munches de les acusaciones que los «enraxonaos» vienen faciendo a los grandes poderes fácticos de les sociedaes: Bancos, Multinacionales… Sábese agora, anque siempre se sospechó, qu’una gran parte de les empreses que coticen na Bolsa española (un 60%), tienen perres en los llamaos «Paraísos fiscales». En total más de 100 empreses. El que más, el Bancu Santander que dirixe 33 empreses afitaes nesos sitios: Les Bahames, Jersey, Islles Caimán… Pero nun sólo’l Santander. Telefónica, Repsol, el BBVA, etc. tamién faen lo mesmo. O seya que me paez d’una sinvergoña ensin llendes, acusar al movimientu 15M de violencia o d’otres coses, cuando los que dirixen les sociedaes nun cumplen con elles, evadiendo impuestos y faciendo negocios «puercos» y, de xuro, illegales. Esa ye la verdadera «kale borroka», la verdadera violencia institucional, y non la de cuatro esaltaos que, enquivocadamente, se llanten ante los Parllamentos a acosar ya insultar a los que nun tomen midides pa que nun pasen eses coses. ¡Ah! Inditex, el que tien lo de «Zara» y otres tiendes, «collabora» con 7 empreses nesos sitios nos que s’evaden impuestos. Ta bien sabelo.
LA PENA DE MUERTE.- Entovía hai munchos paises que caltienen esa rémora del pasáu que ye la Pena de Muerte. La
venganza de la sociedá contra determinaos delitos (nun siempre los mesmos en cada sitiu), y en munches ocasiones ensin guardar nin le mínimes garantíes llegales. Los delitos que lleven a esta abegosa sentencia son, digo, mui variaos según los paises: de tipu económicu, apostasía, bruxería, rellacionaos coles drogues. N’Irán, por exemplu, sigue en vigor la «Llapidación» pal adulteriu dientro’l matrimoniu. Too ello vien rellacionao nel informe asoleyáu por Amnistía Internacional, na qu’amuesen la so satisfaición pol descensu de les execuciones y los nuevos paises que se ficieron abolicionistes. Dientro de los que la caltienen, destaquen los executaos esti añu en Arabia Saudí (27), EE.XX. (46), Yemen (53) y Corea del Norte (60) y, a gran distancia d’ellos, los «miles de persones» executaos en China, a tal puntu que l’asociación A.I. diz que ye imposible saber cuantos, pero que valóralos nesos «miles». Eso nun ye torga pa que’l restu’l mundu comercie con China. Pero eso sí, a Cuba hai que la bloquear porque nun respeta los derechos humanos. ¡Vaya cara!
LA SGAE PÉGASE’L BATACAZU.- Una de les sociedaes más odiaes d’esti país, sobre too pola xente mozo y los habitantes del planeta «interneteru», ye la SGAE. La verdá ye que ganáronselo a pulsu, pola so «mezquindá» y ganes de sacar perres ensin nengún respetu pola cultura popular, les fiestines de barriu o les romeríes, hasta’l puntu de que munches tuvieron que dexar de cellebrase. Agora la plana mayor de la Sociedá cai con tol equipu por una «trama» de desvío de perres en porgüeyu propiu. Eso nun tien que ver colo otro, y pue pasar hasta nuna Ong na que trabaye un tramposu. Pero hai un allegrón xeneralizáu po la «griesca» que nos dieron, tamién colo del «canon». En cualquier casu, yo soi de los que pienso que’l derechu a la propiedá intelectual tien qu’esistir, y que los artistes, del tipu que seyan, tienen de poder vivir del so trabayu, como cualquier otru trabayador. Habrá que se poner d’alcuerdu nel cómo.
CUIDÁU COLOS «CASCOS».- Los «cascos» puen protexer la cabeza, pero tamién sirven pa dir a la guerra. «El nuestru» Cascos llega (como
pensábemos) con gana de guerra, pero yo recomendaría-y una virtú que tou bon políticu tien de tener, que ye la prudencia. Nun val disparar a too, ensin un analís seriu y ensin ver les consecuencies de lo que se diz. Idées como la d’una nueva Universidá Politéunica pa Xixón son mui llambiones, depués de que los xixoneses temos fartucos del sempiternu centralismu carbayón, pero nun pue llanzase allegremente la cosa, ensin pescanciar el costu enorme qu’eso supón y les precaries situaciones que vive l’actual Universidá d’Uviéu. Hai facultaes que nun tienen nin p’arreglar les persianes, lliteralmente. Y si nun hai perres pa una Universidá curiosa, ¿habráles pa dos?
