EL SECUESTRU DE COOPERANTES.- Los últimos secuestros de cooperantes en paises africanos, tán enllenando de preocupación, nun sólo a les families de los mesmos, sinón a les propies organizaciones pa les que trabayen. Al puntu de tener que se plantegar el futuru de les sos actuaciones. Falamos de xente que, en situaciones mui difíciles, acepta trabayar pal meyoramientu de les condiciones de vida d’unes persones a las que namás les xune (que nun ye poco) la so condición de seres humanos. Nun s’entiende, entós, o al menos yo nun lo entiendo, cómo eses organizaciones terroristes carguen, ensin misericordia, contra unes persones que namás pretenden facer el bien y aidar a los pueblos que, lliteralmente, tán morriendo de fame y enfermedaes que n’otros sitios yá tán esaniciaes. Que secuestraren a militares o políticos taría igualmente mal, pero podría ser entendible. Pero facelo cola xente que va a aidar a los sos propios pueblos ye incomprensible. Más que facer el mal pol mal. Cuido que dalgún día, esos pueblos a los que dicen defender-yos lo faigan pagar con creces. Mentanto, como dicen dende «Mélicos ensin fronteres», habrá que seguir lluchando nesa guerra ensin armes que ye la meyora de les condiciones de vida d’esos pueblos, abandonaos a la so (mala) suerte, hasta pola so propia xente.
A ESO SI VAN.- Inauguróse una nueva edición del llamáu «Salón del Llibru Iberoamericanu», un inventu de Luis
Sepúlveda y algún otru amigu, cola collaboración de los socialistes asturianos que lleven tiempu financiando xenerosamente’l dichu inventu. Tengo un amigu, pequeñu llibreru, qu’un añu intentó participar nel «eventu», pero nun pudo porque lu obligaben a contratar a una azafata (qu’ellos poníen) y nun lu dexaben atender a él el so propiu puestu, colo que, si hubiere dalguna ganancia se-y quedaría nel camín. Na inauguración del Salón, cuenta’l periódicu que tuvieron, ente otros, Vicente Álvarez Areces, Paz Fernández Felgueroso, Mercedes Álvarez, Justo Vilabrille y otros cuantos responsables de cultura del PSOE asturianu. Nunca tantu rellumu tuvo nengún actu cultural asturianu. Y ye qu’entovía hai clases. Lo nuestro ye aldeano, y lo d’ellos cosmopolita. ¿Entiéndese, non?
EL DISCURSU DEL PAPA.- L’últimu discursu del Papa, n’ apertura del Primer Alcuentru Interrelixosu n’Asís, ye una amuesa más de la non aceptación de la «llaicidá» de les sociedaes modernes. El Papa, al igual qu’asocede colos paises islamistes, pretenden seguir mezclando relixón y política, de mou y manera que seya aquella (la relixón) la que marque’l camín de les lleis y de les decisiones polítiques. L’antiguu Cardenal Ratzinger dixo, nuna frase dafechamente desafortunada, que los dos rostros de la nueva violencia son el terrorismu y la ausencia o negación de Dios. Con tolos mios respetos pa S.S., tengo que-y recordar que munches de les persones que trabayen pola paz, que dirixen o participen n’ ONGs o que collaboren de cualquier otra manera nel llogru d’un mundu meyor, nun son creyentes. Ye dicir, tán «ausentes» de Dios. Y, dende llueu, el so (el nuestru) agnosticismu nun sólo nun invalida la llucha por esi mundu meyor, sinón que lu fai estensivu a toles persones, ensin fixase si son creyentes o non creyentes, o practiquen una o otra relixón. Poner, entós, nel mesmu planu a los terroristes qu’a los agnósticos ye una «patagüeyada» impropia, non yá d’un Papa, sinón mesmamente d’una persona intelixente.
