close
Olivando

Olivando

LOS NEÑOS, MÁS PROBES.- Cuando se fala de neños probes tenemos el vezu de pensar que ye dalgo que cinca a África, o a dellos paises Llatinoamericanos. Nada más lloñe de la realidá. Un informe d’ Unicef d’esti mesmu mes, tituláu: «La pobreza en España tiene nombre de niño» , afirma que 2,2 millones de neños viven nel nuestru país en «pobreza relativa» camudándose nel coleutivo más afectáu pola crisis económica. Estos neños viven n’hogares con unos ingresos por baxo del nivel de la probeza. El citáu informe fina diciendo que se trata de la cifra más alta de la Europa de los 27, namás superada por Rumanía y Bulgaria. Pero d’esta parte de la «crisis» cuasi nun se fala. Paez ser que nun ye noticia.
 http://www.unicef.es/actualidad-documentacion/noticias/la-pobreza-en-espana-tiene-rostro-de-nino

¿DE QUÉ SE RÍEN LOS DE BANKIA? .- La otra cara de la moneda vémosla na semeya que se publica na prensa, que recueye al Conseyu d’Alministración de Bankia. Posen delantre la cámara como si tuvieren nuna reunión d’antiguos alumnos, o preparándose pa una cena de Navidá de la empresa. Ríense mentanto piden al Gobiernu d’España 30.000 millones d’euros, que nun sé nin calculalo en pesetes. Un dineru que saldría del bolsu de tolos españoles p’atayar la so mala alministración, la so desvergoña. Y el Gobiernu, claro, va a dalo. Nun se pue dexar cayer al quintu bancu del país. Pero, oiga, ¿dalguna responsabilidá habrá que pidir, non? ¿Dalguién sedrá’l culpable de qu’esto pasare? Presidente, Conseyu d’Alministración (por cierto, con políticos de I.X., el PP y PSOE), asesores, controladores (¿pa ónde miraba’l Bancu España?)… ¿O trátase d’una maldición divina, d’un castigu del más allá que se-yos presentó a esos probes dirixentes banqueros? Y llueu tienen la cara dura de dicir entovía que: «ya avisaron a los inversores que lo podían perder todo» (El País, 26-5-12) ¿Pero a quién se-y ocurre que si hubieren avisaro d’eso, dalguién iba a invertir les sos perres en acciones del bancu? ¿Qué piensen, que la xente ye fata? Mete mieu.

RANCIOS Y FACHAS.- La folixa al rodiu de los 60 años de reináu de la Reina Isabel II d’Inglaterra atropó na capital londinense a un piñu grande de los monarques del mundu mundial. Si la institución de la monarquía ye una antigualla que tendría de dir esapaeciendo, el ver al personal que s’axuntó nos fastos ingleses da un poco perceguera. Porque ellí, xunto con los reis de dalgunos paises democráticos (que cada vez pinten menos), habíalos de paises non democráticos, reis polígamos, y otros destronaos. Ente los más criticaos poles organizaciones de drechos humanos, el de Bahréin, represor d’opositores, y el de Suazilandia (que nun sé ónde ta nel mapa), que llegó con un séquitu de 30 persones toos agospiaos nel Hotel Savoy, un de los más caros del mundu. Nun fai falta dicir que’l so pueblu ta pasando fame. En fin, tou un llamentable espectáculu desendolcáu nel Palaciu de Windsor, pa recordanos la inutilidá d’una institución que, en plenu sieglu XXI, nun tien xacíu.