L’INMOVILISMU DE LOS PARTÍOS POLÍTICOS.- Y ye que nun aprenden. La xente de la cai, eso qu’enantes llamábase, un poco grandonamente «el pueblu», nun apara de pedir cambios a los partíos políticos. De dicir que nun los representen, que nun los van a votar, que son heriedes d’un tipu de democracia que yá nun esiste y, como amuesa, tomen les places como exemplu d’una democracia más direuta. Nuna midida a lo meyor poco útil, mal estructurada, pero que desixe un intentu d’aprosimación, d’abandonu d’estructures caduques y d’intereses de partíu pela parte d’estos. Asina lo dicen toos: hai que s’averar a la xente. Hai qu’oyer a la voz de la cai. Pero ye mentira. Siguen saliendo los mesmos, diciendo les mesmes coses. Eso demuestra l’últimu congresu del PSOE xixonés y del PP rexonal. Nel primeru votando a la llinia oficialista, qu’ellos mesmos se definen como «continuistes», en contra d’un candidatu críticu col llabor del partíu, que diba a una «renovación» daveres de los antiguos vicios. Y nel segundu, el del PP, escoyendo a la eterna perdedora Mercedes Fernández que, amás, vien col hachu preparáu pa descabezar al PP de Xixón, tamién críticu cola direición. Y ye que, por muncho que falen, nun acaben d’aprender la lleición. Ellos verán.
DE MÉLICOS Y MELECINA.- Llevamos ya un tiempu demasiao llargu con una güelga de mélicos que ta causando un
fondu malestar nos resignaos pacientes (que somos toos). Una güelga que podríemos dar por bien emplegada si se ficiere en defensa de la Sanidá Pública y a la escontra de les privatizaciones galopantes que se tán produciendo en cuasi toles comunidaes autónomes. Pero dame la impresión que los móviles de l’asociación de mélicos asturianos miren más pa los sos propios intereses, como coleutivu, que pal bien d’esa sanidá pública, gratuita y universal que defendemos otros. Y bien ta que caún defenda los sos propios intereses de grupu, pero que nun se confunda a los probes pacientes (nunca meyor dicho) con una güelga que ta yá produciendo demasiaos problemes a los enfermos asturianos.
BOTELLÓN.- La paliza que-y dieron a un probe porteru d’un edificiu de Begoña, vuelve a poner en candeleru’l tema tan masuñáu del «botellón». Nun sé por qué hai xente que cree que ye mui «progre» permitir l’usu del «botellón», ensin dar unes normes mínimes de convivencia. En cuantes que dalguién fala de «regular» esi tema, los «progres» d’esti pequeñu País salten como un resorte diciendo que non, qu’eso hai que permitir que siga como ta, y qu’abondos problemes tienen los rapazos pa quita-yos tamién la llibertá de beber na cai. Pero’l problema vien cuando esi beber na cai, escede l’ambitu personal y/o familiar, pa convertise nun problema de hixene o d’orde públicu. Porque pa beber tranquilamente na cai, o nun parque, nun fai falta dexar aquello como una cuadra, que m’imaxino yo que na so casa nun lo fadrán (a nun ser que los sos Pas seyan tan gochos como ellos), y muncho menos entamala con contenedores, señales de tráficu, escaparates o palices a probes porteros que lo único que faen ye llimpiar la mierda qu’ellos dexen. Yá sé que nun se pue xulgar a toos por igual, y qu’habrá xente que s’axunta colos amigos a charrar bebiendo nun parque. Ta claro que con ellos nun va la cosa. Pero como, llamentablemente, hai munchos que nun se comporten asina, dalgo habrá que facer pa regular una actividá que nun afeuta sólo a los que la producen, sinón tamién al restu la población. Y si eso ye ser «carca», dame satamente igual.
