NUN VALEN ATAYOS.- El palu qu’acaba de da-y el Tribunal de Drechos Humanos d’Estrasburgu al Gobiernu Español ye apavoriante. En Drechu nun valen les trampes nin los atayos, hai que cumplir la llei. Podemos entender (¡cómo nun vamos a entendelo!) l’odiu y la gana venganza escontra unos asesinos que maten con bombes o d’un tiru na nuca a les sos víctimes. Pero nun estáu de drechu les lleis hai que les cumplir ensin atayos. Y nun ye llegal aplicar esa llamada “doctrina Parot” con efeutu retroactivu. Nin esa, nin nenguna. Si una persona entra na cárcel por un delitu, penáu con una condena concreta, nun pue llueu venir nengún gobiernu a camudar esa condena diciendo que ye que cambio la llei. La nueva, podrá aplicáse-yos a los nuevos delincuentes, pero non a los yá condenaos acordies colo que rixe nesi momentu. Lo contrario supón una inseguridá xurídica impropia d’un país seriu y democráticu. Nin ye llegal, nin ye de sentíu común. Lo que tuvieren que facer fue cambiar primero un códigu penal de la dómina del franquismu, que castigare como se merecen estos delitos de terrorismo o de crímes dafechamente abegosos. Lo d’agora nun val… anque nos pese.
L’AMIGU AMERICANU.- L’espionaxe a gran escala per parte del Gobiernu los Estaos Xuníos a los sos socios y amigos
europeos ye d’una desvergoña tan grande que nun debería dexase ensin rempuesta. Nun pue consentise la intervención y la escucha de millones de mensaxes y llamaes telefóniques que dexen a los ciudadanos europeos a los “pies de los caballos”, inermes delantre de los xuegos políticos norteamericanos. Nin siquier en tiempos de guerra s’espía a los amigos, sinón a los enemigos. Cuánto más nestes circunstancies tan delicaes como ta pasando agora mesmo’l mundu. El Gobiernu Francés yá llamó a consultes al embaxador norteamericanu en París pa presenta-y una quexa formal. ¿Y el Gobiernu Español? Nin ta, nin se-y espera. Faciéndo-yos la “pelota” y naguando por salir nuna semeya col “mocín” Obama. Nunca tán a l’altor.
RIQUEZA PAL CASTELLÁN, PROBEZA PAL ASTURIANU.- Recuerdo qu’una de les torgues que se-y poníen a la llingua asturiana pa oficializala y pa incluyila dafechu na vida social yera aquello de “los mil bables”. En cada llugar falábase distinto, equí usábase una pallabra y ellí otra. Siempre se-yos retrucó cola fonda unidá de la llingua y la esistencia de variantes que, lloñe de minusvalorala, dáben-y más valir. Pa nada servía l’argumentu, seguíen colo de los munchos bables. Agora, nestes xornaes que tán cellebrándose coles academies de la llingua castellana y con illustres escritores ya intelectuales latinoamericanos, valórase como dalgo mui positivo la “riqueza” del castellán, coles sos variedaes, y les sos diferencies léxiques y constructives. La periodista Rosa Montero fala n’ El País de que la gran riqueza del “español” nun ye la so enorme implantación, sinón la so “diversidad, en sus muchas versiones y matices (…) Una lengua común llena de diferencias que no solo no desunen, sino que potencian”. Y digo yo, ¿nun podríemos llamar a eso “los mil castellanos”, al igual que “los mil bables”? ¿O ye que pa ellos val, y pa nosotros non?
UN INTERESANTE CONGRESU.- La realización del Congresu Cultura Asturiana Mozo estos díes nel Auditoriu uvieín
ye una señal de que, pese a les torgues, los desprecios, los silencios y les marxinaciones, l’asturianu ta vivu. Nun sólo eso, sinón que parte de la mocedá asturiana (una parte pequeña, ye verdá) quier que siga vivu. Porque’l fechu d’axuntar nun mesmu eventu a xente de tán diverses como interesantes estayes –televisión, radiu, prensa, blogues, software, escritura, música…- ye un pasu importante pal futuru de la nuestra castigada llingua. Mentanto que llegue la Oficialidá (qué llegará), bien ta seguir trabayando, caún na so estaya, en porgüeyu del idioma de los nuestros antepasaos. Norabona, entós, a les asociaciones entamadores, Fundación Nueva Asturies y L’Arribada pola so interesante iniciativa. Dicir, pa finar, que zarró l’actu Xuan Xosé Sánchez Vicente, Presidente de la Fundación Nueva Asturies y qu’asistió la Direutora Xeneral de Política Llingüística, Ana Fueyo, pero non el representante del Conceyu d’Uviéu nin, llóxicamente, la Conseyera de Cultura doña Ana González. De xuro que taría presenciando un combate de Judo, como’l Dia de les Lletres. Y ye qu’hai que tar preparáu pal combate…
