ALCALDADA.- L’alcalde de Siero, señor Corrales, dimitió del so cargu depués d’una nueche de Comadres (debiere ser de «Compadres») un migayín desmadrada. Estreldó’l coche oficial conduciendo, n’estáu «d’embriaguez». Cuando presentó la so dimisión dixo que lo facía «por ética». Debió sufrir un «lapsus linguae».Querría dicir «por falta d’ética». Suena paecio, pero nun ye igual.
PARTICIPACIÓN CIUDADANA.- La conceyala de Participación Ciudadana del Ayuntamientu de Xixón debiere cambia-y el nome al so departamentu porque, al paecer, nun-y presta muncho esa «participación». Al presentar l’otru día los datos del últimu añu dixo que hubo 4.205 reclamaciones, pero que, anque paecíen munches, eso obedecía a que la xente se movilizaba escontra coses, y formaba «plataformes». Claro, asina, diz ella, aumentase muncho’l númberu de reclamaciones, pero si cada plataforma contare por «una sola firma», ya sedríen munches menos. Paez, entós, que la conceyala del «ramu» (una tal Pilar Pintos) nun quier que la xente s’aconceye pa temes municipales, o seya, pa participar nel bon gobiernu del so pueblu. Lo que debe querer ye una «Conceyalía D’ADESIONES CIUDADANES». Paezme bien, pero eso ye otra cosa.
UN «NELSON» QUE NUN YE ALMIRANTE.- Cúmplense 20 años dende la lliberación de Nelson Mandela. Pasó 27 años 
na cárcel, media vida, como si fuere un delincuente. ¿Dalgún día pagarán los sos xueces y los sos guardianes por esi atropellu? ¿Y si yá morrieron, pagaránlo nel infiernu de Rouco Varela? Hai que tener un altor moral mui grande pa ser capaz de perdonar dalgo asina, salir de la cárcel y sopelexar la reconciliación. Otros, por muncho menos, figuren nel Santoral. ¡Feliz aniversariu, amigu! ¡Y que cumplas munchos más!
LA DIVINA.- L’otru día, mientres planchaba, diome por poner una versión vieya de La Traviata cantada por María Callas. Ye una grabación en direuto d’un conciertu, nel Covent Garden de Londres, del 20 de xunu de 1958. El soníu ye «regulinez», la orquesta nun suena nada bien, y el tenorín qu’acompañaba a «la Divina» (al llau d’ella toos son «tenorinos»), un tal Cesare Valleti, perdíase pol escenariu. Pero cuando s’oyía la so voz, yera como si llegare la primavera en plenu mes d’avientu (yá se que ye una «cursilada», pero cualquier cosa que se pudiere dicir nesos momentos sedría una «cursilada»). Nunca hebo un instrumentu musical más guapu que la so voz. Les copes tremaben, los pelos poníense de punta y el gatu corría a metese debaxo l’armariu (ye una metáfora, nun tengo gatu). Dicen que María Callas morrió en París un día de setiembre de 1977. Tán enquivocaos. Téngola yo equí en casa, conmigo.
ANTROXU ¿ASTURIANU?.- Siento pela radio un anunciu del antroxu n’Avilés. Quedo ablucáu. Pa empezar la llocutora pronuncia «antrosu», que nun sé lo que ye. Y llueu diz con grandes esparabanes vocales que’l platu fuerte del «antrosu» ye Georgie Dann. Igual ye’l nomatu de daquién de Bañugues.
