Ye malo que tenga d’esistir un «Día internacional de la muyer» (nun sé si se quitó lo de «trabayadora»). Y yelo porque esa ye una amuesa de que la discriminación sigue esistiendo. Nuna sociedá na que la muyer tuviere les mesmes oportunidaes que los paisanos, esi Día nun tendría sentíu. Habrá qu’enfotase nello.
Mentanto, ye cierto que, pasín a pasu, les muyeres van algamando una meyor situación respeutu al home, ensin llegar, entovía, a una equivalencia total. Y falo d’equivalencia y non de «paridá», qu’a min ye una espresión que nun me presta. Y ye que dalguna xente arreyada a coleutivos feministes, quier mangar la susodicha «paridá» como una obligatoriedá de que’n tolos ámbitos sociales el númberu de paisanos y el de femes tenga que ser el mésmu. ¿Por qué? Una cosa ye que, de dalguna manera, se torgara la entrada o el desarrollu de les muyeres en determinaes empreses o estamentos, y otra qu’haya qu’obligar a les propies muyeres qu’escueyan dalgo pa qu’asina se dea la paridá. Resulta que les muyeres universitaries prefieren otres carreres enantes que, por poner un exemplu, les inxenieríes. Nun ye que nun tean capacitaes pa ello, sinón que pol motivu que fuere, prefieren estudiar medicina, bioquímica o derechu. Una de les mios nueres ye investigadora nel Mont Sinaí de Nueva York. Ye un cerebrín, capacitada, seguro pa facer una inxeniería industrial. Pero ella prefier esa otra profesión onde se siente dafechamente realizada. ¿Vamos a animala a que faiga otra cosa pa que, asina, cúmplase la paridá? Por cierto, onde ella trabaya nun hai paridá. Son muchísimes más muyeres que paisanos, inclusive a los más altos niveles, y los paisanos tán d’ausiliares o «machacas».
Polo qu’hai que lluchar, creo yo, ye porque toles persones tengan les mesmes oportunidaes, ensin torgues por sexu, raza o condición social. Y si eso se consigue, la paridá cumpliráse onde se cumpla y lo qu’importará será la valía de caún y les ganes de trabayar. La sociedá tien de velar, entós, porque la muyer, que tien munches más dificultaes pa tener unos estudios y un trabayu satisfactoriu, pueda compatibilizalo con otres coses, como por exemplu el ser madre. Porque ehí ye onde tovía se coxiquea demasiao, y onde la muyer realiza un doble esfuerzu pa poder desarrollar les sos capacidaes. Guarderíes, facilidaes llaborales, tratamientu fiscal más afayaízu y… que los paisanos echen, non una mano, sinón les dos nel cuidáu y el desarrollu de los neños. Qu’entovía hai munchu progre de boca pero que llueu… la muyer s’arregle como pueda. En fin, llamentablemente, tovía seguiremos teniendo Dies de la Muyer…
