Delles veces saqué nesti blogue, a lo llargo estos años, el tema de los neños soldaos. Daba, amás, cifres: en diecisiete paises del mundu, la mayoría africanos pero tamién d’otros llugares, siguen emplegándose neños y neñes como soldaos. Cálculase que nestos momentos hai más de 300.000 combatiendo en guerres llocales o rexonales. Lo que se fai con ellos desplicólo perbién Amnistía Internacional: se los droga, convenciéndolos de que con ello son inmortales, y se-yos encarguen misiones de tou tipu, dende disparar un Kalashnikov hasta llevar mensaxes, tresportar agua o desactivar mines. Y pa lo cabero, utilízaselos como oxetos sexuales, sobre too les neñes.
Los llamaos paises civilizaos, dicen dalgo de xemes en cuando, pero non lo suficiente pa condenar y esaniciar esta llácara. En toles reuniones internacionales debería plantegase esti tema, amás de prohibir la venta d’armes a los paises que se sabe qu’empleguen a estos neños. Tien que llegar dalguna anuncia un poco más escandalosa de «lo normal», pa qu’haya una condena universal d’estes práutiques escontra determinada xuventú. Esi ye’l casu de la guerrilla de miserables que se llamen Boko Haram, qu’acaba de secuestrar en Nixeria a más de doscientes neñes d’un colexu y amenaza con vendeles como esclaves. Nun ye la primer bestialidá que faen: l’añu pasáu secuestraron a un grupu de muyeres cristianes que, cuando fueron lliberaes, unes taben embarazaes y otres ya dieren a lluz. L’escándalu al rodiu d’esti actu selvaxe escontra les neñes consiguió qu’eses utres de rapiña que se llamen Gran Bretaña, Israel, Estaos Xuníos o la propia España s’implicaren, polo menos de pallabra, p’atopar el paraderu de les víctimes y ver de facer dalgo por elles. Mentanto, el presidente nixerianu, que tien un nome de risa («Goodluck Jonathan») ta estudiando qué facer al respeutu.
Si toles guerres son un desastre y un fracasu pa la humanidá, éstes nes que les víctimes direutes son neños y neñes nun tienen perdón de Dios. Nin de Dios, nin d’Alá, al que nun tengo’l gustu de conocer pero que, d’esistir, mandaría un rayu divinu escontra esos llamaos islamistes que son peor que les alimañes. ¡Llibertá pa les neñes nixerianes, ya!
