close
Principia la manipulación

Principia la manipulación

2012-08-16Manipulación TVE444Visitas

Por aquello del tiempu estival y la necesidá de desconectar de los vezos añales, llevaba tiempu ensin ver un de los telediarios de la cadena estatal. Esa cadena que, va pocu tiempu, tuvo tolos premios de los profesionales del mediu pola so calidá ya imparcialidá. El resultáu fue deceicionante. Una socesión d’anuncies a mayor gloria del señor Rajoy y del so gobiernu, saludando lo bien que lo tán faciendo. L’únicu «corte» en que salió la oposición fue pa dicir que sofitaben al gobiernu… anque taríen sollertes. Acabé quitándolu.

Nun esperaba muncho más depués de la cara dura d’esta xente que manda, que principiaron anulando l’anterior forma d’eleición, que desixía una bultable mayoría parllamentaria, pa dexala a tiru de la so mezquina mayoría (mezquina polos fines pa la que la emplega) y asina poder escoyer «a deu» al personaxe dócil que manipule la información. Al so favor, claro. D’esi mou, profesionales «como la copa d’un pinu», talo que Pepa Bueno, o la mio almirada  Ana Pastor, fueron pa la cai a les primeres de cambiu. Víase venir cuando esta última entrevistó a l’arguyosa y prepotente Mª Dolores de Cospedal, a la qu’enritó coles sos entrugues. Nun-y lo perdonó. Ta claro, el modelu del gobiernu actual nun ye esi que siempre se cita como «a imitar», la BBC, sinón el que tamién se cita como manipulación y engañu, el de Telemadrid. Nun m’estrañaría que, dende dientro o dende fuera, ocupare un llugar preminente na estratexa de la «nueva Televisión Española», al denostáu señor Urdaci. Y ye qu’estos señores del PP quieren comencenos, col poder de la «so» Tele, de lo bien que lo tán faciendo. El mundu al revés, y siguimos reculando.