Va munchos años que soi sociu de “Mélicos ensin fronteres”, una ONG benemérita que llucha en tol mundu por meyorar l’altor de vida de la xente. Igual n’África que en Sudamérica o na India. Nel so caberu Boletín Informativu plantea un problema que, dalgunes vegaes se nos ocurrió, pero nunca nun fuimos a afondar en serio sobre él.
Trátase de que la pandemia causada pol Coranavirus ye de tal grandor que tapez tolo demás. Y cuando digo too refiérome a otres calamidaes humanes iguales o mayores qu’ella. Ocurre que tolos recursos y tola atención mundial empobínense a atayar esta pandemia y, mentanto, la xente muerre d’otres munches coses ensin que la opinión pública s’entere o, si s’entera, que nun-y dea más. Esto asocede, en parte, porque la Covid-19 muéstrase mui activa n’Europa y EE.XX. y otros países “civilizaos”. Si quedare arrequexada nel Tercer Mundu seguro que nun tendría tanta atención.
Ello produz un abandonu de l’atención pediátrica básica, lo que pon en pelligru la vida de cientos de miles de neños sobre too nes poblaciones más desprotexíes. Hai otres vacunes pernecesaries p’asegurar la vida d’esos neños pero, como informa la Organización Mundial de la Salú, 13,5 millones de guah.es yá perdieron la posibilidá de recibir una vacunación al suspendese campañes masives de prevención por culpa de la Covid-19. Nunes cifres dafechamente apavoriantes, “Mélicos ensin fronteres” calcula que, por cada muerte de Covid-19 que s’evita, podríen morrer más de 100 neños que nun pudieron ser vacunaos. La verdá, pon los pelos de punta. Ellos tán trabayando agora cola vacuna del sarapicu (sarampión) colos neños y neñes de la República Democrática del Congo que, dende l’añu 2000, evitó más de 20 millones de muertes infantiles.
Que too esto nos faiga reflexonar un poco y si queréis echar una manina, podéis empobinavos a www.msf.es onde tarán encantaos de la vuestra collaboración.
