Taba yo en casa planchando (les xeres doméstiques tán perbién distribuyíes) y dióme por poner un discu, como faigo dacuando pa enllenar esi tiempu de silenciu. Otres vegaes invento coses, pero güei tocaba música. Rebusqué pol caxón de los CDs y salióme una antiguaya: ná menos que Paco Ibañez, fíxate tu. Y de sópitu alcontréme sintiendo «Palabras para Julia» y, ensin querelo, ensin pensar nello, el pelleyu volvió a respigáseme. Y vieno a la mio memoria aquel conciertu del Teatru la Comedia d’avientu de 1968. Yo taba faciendo la «mili» en Madrid y tenía dellos amigos na capital que taben estudiando. Pa ellí fuimos Alfredo Toraño, Victoriano Sierra, Pedro Sabando y yo, ente otros que nun recuerdo. Salimos gociosos y esgañitaos. España taba principiando’l cambiu, anque entá quedaba munchu camín. Agora, mientres plancho, pienso en qué poder tien la música que, cuarenta años depués, ún vuelve a revivir coses como ésta. Y, por cierto, qué mal se portó la Democracia con un paisano como Paco Ibañez. La memoria ye mui fráxil y los politicos d «izquierdes» mui desagradecíos. Y una cosa curiosa, dalgo que tenía que ser ( que yera) dafechamente alloriante, como facer la «mili», camudóse pa mi en parte de la mio educación sentimental y política. Esi añu coincidió tamién el «Marat-Sade» de Peter Weis en montaxe de Marsillach que tamién fuimos a ver. Tuvimos suerte, a los dos díes trancaron el teatru y acabóse la obra.
En cuantes a la educación/deseducación sentimental, ún ye frutu de too eso, y de los «cuplés» qu’interpretaba mio güela Angélita y que yo escuchaba nun tayuelu de la cocina, y del «Xilguerín parleru» que cantaba mio padre mientres s’afaitaba. Y de Yupanqui, que nun yera de la familia, pero casi. En fin, esto de la plancha da pa muncho.
