La Conseyería de Cultura del Gobiernu del Principáu «pide a Fomento que replantee su postura con la señalización». Bien. Agradezse la intervención, con un par de matices. El primeru que’l verbu «pide» quédase, nesti casu, mui curtiu. Si Asturies tien razón (que la tien) en da-y valir «oficial» a los topónimos asturianos, qu’aprobó’l nuestru gobiernu, y polo tanto, el Ministeriu de Fomentu nun tien esa razón, el verbu castellanu a emplegar debiere ser «exige». Entós la cosa quedaría, más o menos, asina: «La Consejería de Cultura exige a Fomento, en cumplimiento de la normativa legal, la señalización asturiana de las carreteras estatales que discurren por el Principado». O dalgo asemeyao. La música ye paecía, pero la partitura ye otra.
Segundu matiz: La cosa ye muncho más fácil que tener qu’andar protestando, espatuxando y molestando a «la superioridá» (madrileña), que bastante tien colo suyo, cada vegada que nos marxinen: Nel Ministeriu d’Educación (llei Wert), nel de Fomentu (señalización), o n’otros casos que se podríen citar. Una cenciella fras nel Estatu d’Autonomía diciendo que nel territoriu del Principáu, la llingua asturiana sedrá oficial xunto col castellán, y problema solucionáu. Yá nun tenemos que molestar más, nin sentinos agraviaos cada poco pol gobiernu central. Nin considerar como «inutil» tolo que se fai equí cola llingua porque, como vemos llueu, nun val pa nada. Y depués d’asitiar esa pallabrina nel Estatutu, como persones civilizaes, podremos sentanos a discutir cómo podría ser esa oficialidá, que nun tien que ser, necesariamente, igual qu’otres. Podría dir aplicándose n’etapes, o de mou diferíu… nun sé. Nun quiero improvisar, pero de xuro qu’habría formes de proclamar la oficialidá ensin llevantar grandes rocées, nin crear grandes problemes. Y ye que, seyan pocos o munchos, hai una parte considerable de la sociedá asturiana que lo reclama como un derechu cívicu al qu’hai qu’atender. Un derechu que nun va escontra naide porque, al ser el so emplegu voluntariu, naide pue sintise agredíu. Y, en cambiu, la so prohibición o marxinación a niveles oficiales, sí que crea un agraviu comparativu a esa parte de los asturianos que queremos utilizala. Asina pues, nun faen falta tantos esparabanes nin aforfugos cada vez que sal el tema de la nuestra llingua. Tiénenlo bien fácil: fáiganla oficial yá.
