Pasó l’otru día perequí, per Asturies, el que fuere direutor del Centru Niemeyer, señor Grueso, llamáu a declarar como imputáu nuna denuncia xudicial en rellación coles cuentes y factures del so mandatu. «Delitos societarios y de malversación», dicía la denuncia presentada. Como la cosa ta «sub judice «, que se diz nestos casos, vamos presuponer la so inocencia mentanto nun se demuestre lo contrario. Pero lo que me resulta dafechamente enritante son eses declaraciones, pomposes ya irresponsables, afirmando que «los políticos de Asturias han destrozado el principal proyecto cultural del país». Menos llobos, Capiellina. Pa principiar habría que saber de qué «país» fala, porque muncho me temo que nun fale «del nuestru país», sinón d’esa otra cosa más grande que se llama España. Y nun ye ésta una diferenciación vana, porque lo qu’hai que pidir a una fundación construyida con perres asturianes y financiada con perres asturianes, ye que la cultura que faiga tea enraigonada nel «nuestru país».
Y ye que Asturies ye un pequeñu país que tien la so propia cultura, la cuál nun tien nada que ver con esa otra «cultura» del espectáculu, los «divos» sociales y los «fueos artificiales» qu’entiende’l señor Grueso que ye la meyor cultura del país. Yo polo menos prefiero que les perres nuestres vaigan al nuestru teatru, a los nuestros músicos, a los nuestros escritores, a los nuestros pintores o fotógrafos, a los espectáculos propios, que a trayer a Kevin Spacey, a Jessica Lange o a Woody Allen, o a financiar esposiciones como aquella «Luz» de Carlos Saura que costó 473.000 euros.
Pero nun ye sólo la clas de Cultura de lo que tamos falando, ye que, un responsable cultural, que remana dineru públicu
y d’instituciones privaes asturianes, tien que s’atener a los presupuestos marcaos. Y ye que’l señor Grueso, se «tapiñó» tol presupuestu asignáu, y amás dexó un pufu de 2,5 millones d’euros que, imaxino yo, habrá que pagar de dalgún mou. En resumiendo: Los políticos asturianos tienen munches culpes y faen munches coses mal, ente elles tola forma d’abordar esti tema del Niemeyer, y la falta de controles qu’hubo nel tema les perres. Pero echa-yos a ellos la culpa de «destrozar el principal proyecto cultural del país», como diz el señor Grueso, ye una falacia. Primero porque esi proyeutu cultural paezme una engañifa, y segundo porque’l que se lu cargó fue’l propiu señor Grueso, que tuvo tol tiempu gastando más perres de les que tenía. O como vulgarmente se diz: «tirando con pólvora del Rei.» Y eso, al marxe de qu’hubiere «irregularidaes» o non, qu’eso yá lo dirá’l xuez.
