La vuelta al cole, tal y como sopelexaben los anuncios d’El Corte Inglés -al que siempres odié por ello- suponía dafechu un montón de coses entellazaes y nenguna yera buena: el final del branu, claro. Pero con ello, tolo qu’eso supón de díes curtios, de mal tiempu, de fríu, de vuelta a los llargos y aburríos iviernos. Y sobre too de vuelta al trabayu, a la responsabilidá, a les coses series qu’a lo llargo d’unos meses quedaren en suspensu. Cuando yera neñu, aquellos últimos díes de playa, ya con setiembre aniciáu, metiénme nel alma una señaldá que cuasi me facía llorar. Polo menos que m’atristayaba. Esa señaldá que, por poner un exemplu, recueye la estraordinaria escritora que fue María Teresa González:
Qué pensará la mar
cuando dispierte,
ocle na piel,
l’alborecer abriéndose al iris soñolientu,
y nel profundu vientre, como un nenu,
cañicándose un besu, que posara los llabios de setiembre.
Principia, pues, un nuevu ciclu añal nel que pequeños y mayores tenemos -metafóricamente- que volver al cole. Yo, que llevo xubiláu un tiempu, igual nun lo noto tanto, anque la señaldá cute igual a cualquier edá, pero los non xubilaos tienen que tomar en serio dende ya, estes prósimes feches onde yá finó’l descansu y principien les responsabilidaes. Y pienso nel PSOE y Podemos. Y en Boris Johnson. Y na eterna crisis arxentina. Y nesi babayu de Salvini que se pasó de chulo y facilitó ponese d’alcuerdu a dos fuerces hasta agora contraries. Y nel nuestru Parllamentín que tien que se poner les piles, o la batería, o dase cuerda como a los muñecos y empezar a furrular daveres. Porque yá s’acabaron les époques de campañes, y hasta los 100 díes de gracia que se conceden. Y a ver si vemos cumplíes les esperances puestes nesi Barbón, y les sos promeses. Y la xente nuevo que trai con él. Lo dicho, amigos, acabáronse les folixes y principia lo serio. Asina que ¡toos al cole!
