Teníame prometío a mi mesmu nun falar del covid, nin del confinamientu, nin de les decisiones más o menos atinaes del Gobiernu de Sánchez. Ye tal el ruíu, el marabayu, l’acosu al que tamos sometíos a cualquier hora del día y por parte de tolos medios de comunicación que -yo polo menos- necesitamos un migayín de descansu. De que’l maxín desconeute, de pensar n’otres coses y otros asuntos. Yá sé que ye difícil, pero quería preservar esti pequeñu espaciu dixital pa dalgo distinto. Por ello nun quería falar de lo anterior. Pero sal agora un nuevu términu que, la verdá, acoyona un poco: El toque de queda.
Esti qu’escribe siempre tuvo rellacionáu esi términu con guerres, estaos d’esceición fascistes, o golpes d’estáu militares que lo primero que faen ye decretar el toque de queda y controlar a la xente nes sos cases. Un imaxinariu cultiváu tamién por una montonera de películes nes qu’asocedía precisamente eso. Por recordar una, la guapísima «Desaparecido» de Costa Gavras, con unos xeniales Jack Lemon y Sissy Spacek. Qué mieu daba, nesos casos, el nun llegar a casa antes de la hora del toque de queda, colos militares patrullando les cais y deteniendo o disparando a tol que se moviere.
Atalanto que la cosa de los contaxos y les hospitalizaciones (igual nun tanto los fallecimientos) ta algamando unes cifres peligroses y, claro, dalgo hai que facer pa cortalo y revertir la situación. Mentanto llega la esperada vacuna, el gobiernu del estáu y los «gobierninos» tienen que probar tolo que tea na so mano pa que’l virus nun s’esparda, anque dacuando da la impresión qu’anden dando palos de ciegu. Aceuto too eso, como aceuté y defendí’l confinamientu de la llamada «primera fola». Creo que toos, ente los que m’incluyo, dimos un exemplu de ciudadanía. Pol mesmu motivu toi dispuestu a nun salir a la cai nel horariu que se nos diga. Pero, por favor, que lo llamen d’otru mou. Qu’inventen un términu nuevu, que consulten cola RAE o cola Academia de la Llingua Asturiana, y que pongan otra pallabra, otra espresión, pero que nun utilicen el términu «Toque de queda». Paez una babayada, pero nun convién que la xente s’avece a banalizar determinaes espresiones que lleven implícita una carga negativa, antidemocrática y dictatorial como ésta. Nun quiero acostumbrame a xugar coles pallabres nin a retorceles, y menos con términos d’esi caláu. Y ponme los pelos de punta el sentir a toles comunidaes al empar pidir «el toque de queda». Munchu cuidáu, nun vaya a ser que cualquier día nos dean un «Golpe d’Estáu» de verdá, cola sida de que ye por dalgún motivu humanitariu.
