El fin de selmana pasáu tuvi, en viaxe familiar, na capital del Reinu y aproveché pa ver dalgunes esposiciones que m’interesaben. Madrid sigue siendo una ciudá ablayante, enllena tráficu, ruíu y fumu pero, a cambiu, un pue relaxase y adeprender en sitios qu’equí, en provincies, nun podemos. Por exemplu, nestes tres esposiciones.
La primera titulábase «Alejandro Magno: encuentro con Oriente» y taba espuesta nel Centru Cultural Canal de Isabel II. Como entamu, p’abrir boca, proyeutaben nuna salina mui afayaíza, que facía como d’antoxana, un audiuvisual en 3D que se nomaba» «Alejandría, el sueño de Alejandro». Una cosa perguapa, que dura unos trece o catorce minutos y qu’enseña cómo se construyó la ciudá fundada por Alexandru y les riqueces que llegó a atropar. Claro, el bonu d’Alexandru eso nun fue a velo, porque coló al pocu tiempu d’ellí, camín de les glories que-y esparaben más alantre, más al oriente. Depués, la propia esposición, dixebrada en 10 sales, enllenes de paneles, vidios y más de 330 pieces de 40 museos, tanto d’Europa como asiáticos, que son a ufiertanos, nun solu percorríu, un ensame d’estremaes cultures espardíes per tol planeta. Amuesa interesantísima, que nos da a conocer la vida d’esti gran personaxe que, en tan solo trece años, punxo baxo los sos pies al gran imperiu Persa y a toles rexones estremes del mundu entós conocíu.
La segunda esposición taba asitiada nel Muséu Thyssen, de la baronesa, y llevaba por títulu: «Heroinas». L’interés que
tien ye’l d’amosar una imaxen de la muyer nel arte, mui estremada a la que tamos avezaos. La muyer como protagonista, tanto considerada nel so papel d’oxetu, como nel de suxetu. Muyeres guerreres, muyeres que compiten colos paisanos, campesines con cares desafiantes… y tamién suxetu de la obra d’arte, pintores, fotógrafes, autores d’instalaciones… Nomes consagraos (Caravaggio, Rubens, Morisot…) y otros pa min desconocíos. De lo que más me prestó, un Degás que pinta a unes mocines Espartanes provocando a los mocinos, y retándolos a competir; el maraviosu retratu de Hopper del cuartu del hotel, con esi tastu de soledá infinita; y un mui prestosu cuadru de la republicana Maruja Mallo, que perteneció al Lyceum Club, pintora, escultora, ceramista y que vivió un tiempu, de moza, n’Avilés. Muyer de gran cultura y que trató colos meyores intelectuales de la dómina. L’únicu «pero» que yo pondría a la esposición, ye que me paeció un poco curtia de materiales. Polo demás, mui bien.
Y la cabera esposición titulábase «El esplendor del Románico», y 
allugábase nel Centru Cultural Fundación Mapfre. Trátase del conteníu que, sobre esti arte medieval, hai depositao nel Museu Nacional d’Art de Cataluña (MNAC). Unos fondos mui valiosos, formaos por talles, cuadros, tables y pintures murales pasaes al llienzu, pente medies d’unos mui delicaos procesos téunicos. Toa una riqueza cultural que define perbién la importancia de Cataluña como comunidá diferenciada. Paecióme, ensin embargu, de mal gustu nun tener nin una sola cita, nin en Catálogu, nin nos paneles desplicativos, al arte Prerrománicu Asturianu, anterior al suyu, y que nun-yos merez nengún comentariu. Como si nun esistiere. Pero bono, yá sabemos cómo son ellos. Y sobre too, cómo somos nosotros, incapaces de danos a conocer y de danos a valir fuera de les nuestres llendes. Y dientro tampoco, claro.
