Tien sombreru de gauchu de les pampes, mirada estrábica, güeyos rellumantes como tolos obsesivos y una barba rala d’adolescente que quier ser mayor. ¡Ónde tuviesti hasta agora, que nun te conocíemos! ¡De qué planeta vinite, Miguelín, a emporcar cola to llingua la nuestra llingua! Tu si que yes casta, amigu insensatu y nonpensante. Tanto que si se te define ye por esi apellíu de mal recuerdu, de persona desagradecía que cuspia nel platu que-y da de comer. Polo visto, tienes un espaciu na rede que se llama «pervivencia y actualidá». Home, pervivirá porque ye gratis, pero d’actualidá poca: vienes a dicir, con peor estilu, coses mui vieyes, mui antigües, repetíes polos tos mayores, anque to padre tuvo una época en que, manque te pese, prologó Gramátiques Bables y defendió’l so usu, claro qu’igual eso, dientro de la to supina inorancia, nun lo conoces. Pídemelo, si quiés, que lo tengo perequí a mano. En fin, la to forma d’espresate ya te define como lo que yes: un bocayón que si viviera mio güela mandaría a «llavar la boca con xabón». Anda, vete y nun peques más, Miguelín Alarcos, galgu de casta.
