Nun rarísimu Día de les Lletres Asturianes, rarísimu por mor del famosu Covid-19, entregóse a don Xuan Xosé Sánchez Vicente, nel Aula Magna de la Universidá d’Uviéu, el II Premiu Nacional de Lliteratura. Como recordarán los llectores d’esti blogue, el I fue pa don Xuan Bello Fernán. Diome bastante murnia que l’actu nun tuviere’l rellumu qu’avecen a tener estos fastos, afitaos nun Teatru Campoamor enllenu y engalanáu pa la ocasión, máxime cuando cuntábemos cola presencia na menos que del Presidente del Gobiernu Asturianu y el de la Xunta Xeneral del Principáu, ente otres personalidaes.
Amás de les autoridaes y una representación d’eso que da en llamase “la sociedá civil”, tábemos tamién los académicos de númberu, esti añu allugaos nel “gallineru”. O seya, nun aula axunta a la Magna, viendo l’actu por televisión. Un (polo menos yo) nun sabía mui bien, dende’l destierru, si aplaudir o non, si quitase la corbata o non. En fin, como siempre diz un amigu míu “too ye cultura”.
El casu fue que’l premiáu, al igual que’l nuevu miembru Correspondiente don Pablo Rodríguez Medina, pronunció’l so discursu depués de la llectura del Acta que recoyía los nomamientos. Dambes intervenciones fueron, ca una al so estilu, mui guapes. La verdá ye que sintiendo falar a Xuan (perdón pola familiaridá, pero son munchos años d’amistá) vi pasar delantre los mios güeyos un resume d’esos 45 años que dalgunos llevamos trabayando pola llingua, pola lliteratura, y por dalgo más qu’igual podía llamase “sentimientu d’asturianidá”, si’l términu nun tuviere yá un poco masuñáu. Asina, al igual que dicen que’l que va a morrer ve pasar la so vida entera nun segundu, recordé toos estos años nos que s’amestaron momentos prestosos y otros momentos duros. Dalgunos mui duros. Y na mayoría d’ellos (non los más íntimos, claro) tuvo presente Xuan Xosé d’un o otru mou. Dende aquel 1975 en que lu conocí (paecía un vikingu, con aquella gran barba roxa y la camisa blanca ensin cuellu), hasta precisamente esti día en que lu sentía dende’l “gallineru” a traviés de la “tele”.
Y digo, que si hai dalguién que mereza más que ningún otru un llamáu “Premiu Nacional de Lliteratura”, esi ye’l señor Sánchez Vicente, don Xuan Xosé. Fizo muncho, y tolo fizo bien (falo de lliteratura, claro): Poesía, Cuentu, Novela, Ensayu, Investigación, Teatru… nun sé si me queda dalgo. En too ello destacó anque, llóxicamente, yo tenga les mios preferencias. (¡Ai, aquellos primeros poemes que tanto relleímos…!) Pero, amás d’ello, tuvo eso que n’economía se llamen “los intanxibles”. Dalgo que nun pue contabilizase pero qu’aporta un valir inmaterial añadíu. Xuan aportó, a la cultura asturiana, munchos “intanxibles”.
En fin, qu’una Norabona mui grande pa Xuan Xosé Sánchez Vicente, persona a la qu’estimo dende va munchu tiempu. Dende les discrepancias, que nun fueron poques, pero tamién dende l’almiración que siempre-y tuve pol so importante llabor nel campu sociu-cultural. Un premiu Nacional mui xustu pa el y la sensación de que, si Xuan tuviere ñacío nun País “normal”, tendría un reconocimientu social milenta veces mayor. Pero, claro, ¡esto ye Asturies, amigos…!
