La Secretaria d’Organización del PSOE y senadora, Leire Pajín, fizo una gran defensa de la iniciativa presentada por un piñu de senadores nacionalistes, nel sen de la posibilidá d’emplegar les llamaes «llingües oficiales» na Cámara Alta, tamién llamada «Cámara Territorial». Pa ello espresóse n’Euskera, Galego y Catalán, amás, lóxicamente, de en Castellán. Yo oyila pela radio, y tanto’l tonu de la so intervención como les coses que dixo fueron mui acertaes. Falando n’Euskera dixo que yera la llingua de los sos güelos, la so llingua materna y una llingua que nun quier perder, porque ye «diferente, especial». Como toles llingües del mundu, añado yo. Toes son «diferentes y especiales».
Pero doña Leire Pajín fizo una afirmación que ye mentira, una gran mentira. Dixo, y cito textualmente: «El Senado es la cámara territorial y debería espresarse en todas las lenguas en las que se expresan los ciudadanos». (El sorrayao ye míu). Y ye mentira, porque na iniciativa que defendió y que s’aprobó, nun figura una d’eses llingües nes que s’espresen los ciudadanos: L’Asturianu. Hai, pues, una parte de la ciudadanía española que sigue ensin poder espresase na so llingua. Esa llingua que tamién, como nel casu d’ella, falaron los nuestros güelos. Que tamién, como nel casu d’ella, ye la llingua materna de munchos de nós. Y que tamién, como diz ella, ye pa nós «diferente y especial» y tampoco queremos perdela.
Pero hai dalgo más grave entovía, y ye qu’eso asocede porque compañeros suyos de partíu, collacios que trabayen coldu a coldu con ella, tán torgándonoslo. Tán discriminándonos. Tán faciendo que seyamos ciudadanos de segunda, que nos avergoñemos de falar como falamos, y d’escribir como escribimos. Si la señora Leire Pajín quixera, de verdá, que nel Senáu s’espresaren toles llingües nes que s’espresen los ciudadanos, debería incluyir al Asturianu (y al Aragonés) nesa rellación de llingües oficiales del Estáu pa que tamién se sintiera la voz propia del nuestru pueblu.
Una cosa más. La señora Leire Pajín miente. Pero la culpa de que mienta ye d’un grupu d’intolerantes que representen al so partíu na nuestra comunidá. Un grupu enfotáu n’acallentar la voz antigua d’Asturies. Que s’atreven a dicir en público que mientres ellos gobiernen, l’Asturianu nunca sedrá oficial. Un grupu que va a la escontra de lo que’l so partíu defende n’otros llugares de la xeografía española. Recientemente tuvi per Galicia y pude lleer unes declaraciones del Secretariu Rexonal del PSOE gallegu, un tal Manuel Vazquez que, ante la postura del PP nestos temes, amenazaba con sacar las masas a la calle en defensa del galego. Y yo entrúgome: ¿Nun-yos caerá la cara de vergoña a los dirixentes asturianos? ¿Tan poco quieren a la so patria, a la so llingua, a la so hestoria pa facer lo que tán faciendo? Nun sé cómo se llamen los Senadores escoyíos pa representar a Asturies nel Senáu. Nin los del PSOE nin los del PP. Pero mientres otros defendíen lo suyo, ellos callaron como afogaos. Ta bien, tomamos nota. La vida da munches vueltes.
