El día 24 de xineru d’esti añu, colgaba yo nesti blogue un comentariu sobre’l, d’aquella, candidatu socialista a la presidencia de Francia, François Hollande. Titulábase ¿Una lluz ente la borrina? , y n’él amosaba la mio esperanza nel trunfu del candidatu col envís d’aniciar cambios fondos nes polítiques económiques y sociales europees. Pasaron cuasi cuatro meses y esti día tola prensa internacional recueye les semeyes d’un Hollande ya presidente francés «in pectore». Poro, cumpliéronse los mios deseyos.
La entruga agora tendría de ser: ¿y va a poder el candidatu socialista llevar a cabu les bones intenciones amosaes nel so programa ellectoral? ¿Nun finará asimilándolu eso que se da en nomar «el sistema» (instituciones, compromisos, aliances, inercies…) quedando tol so discursu nun catálogu de bones pallabres? Espero que nun seya asina, non tanto porque vaiga a cuntar cola simpatía y la axuda d’otros políticos y estamentos (nin siquier nel so propiu país), sinón porque les otres polítiques, les alternatives, ya demostraron dafechu la so inutilidá. El cículu viciosu denunciáu repetidamente, ente otros, pol premiu Nobel d’economía Paul Krugman de: axustes-decrecimientu-disminución de riqueza-paru-emprobecimientu-más depresión-imposibilidá de devolución de la deuda-nuevos axustes, etc. nun lleva a nenguna parte, masque a la ruina de los paises. Asina qu’agora, aprovechando eso que se llamen «les sinerxes» del nomamientu y l’empuxe del fenómenu Hollande, otros xefes d’estáu van ponese na mesma órbita p’amestar, al cuidáu col deficit, nueves polítiques de crecimientu que desfoguen dalgo a unes sociedaes que tán na UVI. Y ye que, amás, eses polítiques de recortes agresivos tán produciendo, a parte del desmontaxe d’un estáu del bienestar que tanto costó facer, el nacimientu y desarrollu d’importantes grupos fascistes o neofascistes qu’irrumpen nos parllamentos europeos,
cuando siempre fueron, namás, grupos residuales. Ye’l casu de Marine Le Pen, que cola derrota de Sarkozy, va a capitalizar al so favor gran parte del votu de dereches nes prósimes eleiciones llexislatives. Y ye tamién el casu de Grecia, onde un grupu «neonazi» nomáu «Aurora Dorada», algama 21 diputaos (viendo la imaxen qu’apaez na semeya, mete mieu) col eslogan de «los inmigrantes fuera de la mio casa». Dalgo asemeyao asocedió tamién, como recordamos, en Finlandia y en Holanda. Queda por ver, dientro d’esti nuevu panorama que s’abre, l’actitú de la otra «dama de fierro», Ángela Merkel, la del axuste puru y duru. Nun lo va a tener fácil pa siguir nes sos «trece», nun sólo pol cambiu esternu, sinón porque, a nivel internu, la socialdemocracia alemana va presionar nel sentíu contrariu y dientro d’un añu hai eleiciones presidenciales n’Alemania. Y yá se sabe, «cuando les barbes del to vecín -Sarkozy- veas pelar, pon les tuyes a remoyar». Barbes metafóriques, claro.
Habrá, pues, que siguir el futuru de François Hollande porque ye la única esperanza que nos queda. Persabiendo les enormes dificultaes y pilancos que va a tener, y que les coses, en política, nunca algamen la rapidez que sedría menester. O seya que sollertes al futuru inmediatu, pero col comencimientu qu’entá queden munchos regodones nel camín que queda por percorrer.
