Termínase, col discursu de la toma de posesión por parte de don Javier Fernández, col llargu procesu que llevó d’ún gobiernu presidíu por don Francisco Álvarez-Cascos, que duró menos qu’un carambelu a la puerta una escuela, a otru con mayoría del PSOE y dos pegoyos, dafechamente contradictorios, que son UPyD ya I.X. Pente medies quedó tolo que quedó, y que como ye de toos conocío, nun voi repitir agora. Del nuevu gobiernu dicir que, en principiu, préstame qu’haya más muyeres que paisanos porque, anque eso nun ye indiz de meyor «gobiernu», sí ye un síntoma de normalidá y nun tien porque ser siempre lo contrario. Hai otres coses que me prestaron menos.
Yá sé qu’ hai un periodu protocolariu de «tregua» (que suena como un nome de guerra histórica), el «de los 100 díes», que suel dase pa pasar a enxuiciar el llabor d’un gobiernu o otra institución que venga de nuevo. Y nun seré yo quien lu ruempa. Pero eso ye pa xulgar esi llabor, non otres coses que, diches yá nun principiu, nun tienen por qué compartise. Y ye que con esta toma de posesión presidencial y les afirmaciones qu’ellí se faen, da la impresión que don Javier Fernández vien de «nuevu» a esti campu de la política y del «mandu en plaza». Esa Asturies qu’aspira a meyorar, a poner en funcionamientu col «rumbo claro» y «el Norte indicado», ye la mesma que’l so partíu dexó como ta, va unos pocos meses. Por mal que lo ficieren los de FORO, tampoco nun tuvieron tiempo d’empeoralo tanto. Y nesi partíu que, cola esceición del periodu de Marqués, gobernó siempre Asturies, don Javier tuvo, sobre too nos caberos tiempos, un puestu d’enorme responsabilidá. Asina que, agradecémos-y la so bona disposición pal mandu, pero sabiendo que nun
ye un debutante na política, nin n’esi mandu.
Y hai un par de cosuques más que tampoco nun me prestaron, ya de mano. La primera (anque nun s’esperaba otra cosa) la so referencia a la llingua tradicional de los asturianos, a la que -dixo- nun va a concede-y la «oficialidá» sinón a quedase, namái, na so «proteición». Ignorando, o queriendo ignorar, que nesti momentu de cuasi desapaición de l’asturianu (UNESCO dixit) la única proteición efeutiva que tien la nuestra llingua ye la Oficialidá. Y aún asina, nun sabemos si sedrá abondo.
La otra ye esa referencia «españolista» nel so discursu de que: «No hay, lo saben, español más orgulloso de su patria que un asturiano«, citando como fontes a Ortega y a Madariaga que, por cierto, nengún de los dos yera asturianu. Reconozo que la frase, nel so contestu, queda mui guapa, pero nun ye cierta. Y cenciellamiente nun lo ye porque hai estudios fechos sobre’l tema, más fiables que les intuiciones orteguianes o madaraguienses. Toi refiriéndome, por exemplu, al estudiu sociollingüísticu publicáu pola Conseyería de Educación, Cultura, Deportes y Xuventú del Principáu d’ASturies, coordináu pol equipu de Francisco J. Llera Ramo. Un de los más reputaos sociólogos españoles. «Los Asturianos y la lengua asturiana», se llama l’estudiu, y un de los apartaos del mesmu titúlase, casualmente, «La identidad asturiana» (px. 44-45) Ellí entrúgase a los asturianos (a la muestra recoyía, claro) el nivel d’autoidentificación coles siguientes categoríes: «Español ante todo»; «Español y asturiano»; «Ambas cosas»; «Asturiano y Español» y «Asturiano ante todo». Y de toes estes categoríes, namás un 11 % declárase de la primera, siendo la más aceptada la cuarta (primero asturianu y llueu español) con un 33 %, y teniendo la de «Asturianu ante todo» un 16 % de votos, que nun son pocos.
Resulta, pues, un topicazu esa afirmación que don Javier Fernández se sacó de la manga ensin tener nenguna base en qué sofitase, más que les declaraciones de xente foriata, de que los asturianos somos los más orgullosos de ser españoles. Yá vemos que los estudios serios fechos sobre’l tema desmiéntenlo. O sea que yo respeto que’l nuevu presidente que tenemos se sienta más español qu’asturianu, pero que fale por él solu porque, pa esto, a munchos nun nos representa.
