Esi ye’l nome d’una esposición, entamada pol Ayuntamientu de Xixón y l’Atenéu Obreru, que ta a puntu finar na Biblioteca Xovellanos de Xixón. Unos cuantos paneles, delles semeyes y dalgún oxetu (como una bomba que namás vela mete mieu), ye abondo pa que pescanciemos lo que tuvieron de ser aquellos 15 meses de bombardeos sobre la población civil de Xixón. Una población desarmada, constituyía por homes, muyeres, neños, neñes y ancianos. Si la historia nun condenare yá dende va tiempu (nun tantu, claro) los crímenes del franquismu, los datos qu’ellí se dan y les semeyes abastaríen pa poder facelo. Dende el 22 de Xunetu de 1936, o seya namás cuatro díes depués de la rebelión militar, y hasta’l 21 d’Ochobre de 1937, (el día enantes entovía hubo bombardeos), la ciudá sufrío, con una regularidá alemana, el bombardéu dende’l mar, colos proyeutiles del Cruceru «Cervera», y dende l’aire, coles incursiones de la llamada «Legión Cóndor». Hasta 15o abellugos («refugios») tán contabilizaos y dataos na nuestra ciudá.
Toos estos ensañamientos cola población civil xixonesa, tuvieron tapecíos hasta va pocu tiempu. Tala yera la
vergoña qu’a los propios franquistes-yos daba un fechu semeyante. A la escontra de lo qu’asocedió en Guernica, que tuvo resonancia internacional, lo que pasó en Xixón foi como si nun esistiere. Hasta pa morrer hai que tener suerte. En Guernica hubo un solu bombardéu (el 26 d’abril de 1937) col resultáu d’unos 12o muertos. Un actu horrorosu ya indignante. Pero en Xixón, repito, fueron quince meses con un númberu de muertos ensin contabilizar. Sólo nun día, el 14 d’agostu del 36, hubo más de 50 muertos. Muertes, eso sí, silencioses.
Si tenéis oportunidá de dir a ver la esposición, habéis de dir. Ye una cosa cenciella, fecha con cuatro coses y un vidiu que, amás, ye ensin pallabres. Pero cuando se siente l’únicu soníu, que ye’l d’una sirena d’alarma, a ún pónse-y un ñudu nel gargüelu. Guardemos na memoria estos fechos. Ye l’únicu homenax que-yos podemos facer a aquellos muertos. Los de Xixón.
