Allégrome polos hosteleros, los hoteleros, los entamadores d’actos festivos de cualquier frasca, los barrios y parroquies que cellebren el santu o la santa, la Cámara de Comerciu que fai la Feria Muestres, l’Ayuntamientu que nos enllena les places y requexos xixoneses de cantantes llocales o foriatos, los vendedores de pólvora pa los voladores, los clochards o cenciellamente pidigüeños… Allégrome por toos, y polos que se m’escaecen, pero esto nun hai Dios que lo aguante. Tengo tanta gana de qu’aporte l’iviernu que toi dispuestu a pasar pol mal tiempu (ye un dicir, mal tiempu yá lu hai) pa que termine tou esti guirigay que nun tien fin. Ye verdá que siempres tuvi un poco síndrome de Robinsón (podemos llamalo agorafobia), pero ye qu’esto yá ye demasiao. Actividaes y actividaes que quieren batir records de «a ver quién lleva más xente», o «a ver quién mete más ruíu», ensin dar un poco descansu al personal. Falo de min, claro, porque l’otru personal, o seya’l restu del mundu, paez que ta encantáu con esti sinvivir. Desesperaos por divirtise hasta’l puntu de suicidase diendo a escuchar a Marta Sánchez, por poner un exemplu a mano. Lo malo ye qu’esto namás ta principiando. Habrá que pasar entovía polos Toros, la Nueche los Fueos, el Concursu Hípicu, el restu de romeríes de les parroquies que falten, incluyida la de Pión que tengo al llau… De pensalo pónenseme los pelos como escarpies. Y ye que dalgunos vienen y marchen. Pasen unos díes y cuelen pa la tranquilidá de la so casina, pero otros, como esti desgraciáu qu’escribe, quédase equí tol añu. Aguantando lo que-y echen. Y encima vien Abelardo y diz dende la Plaza Mayor que se prohiben les tristeces, o seya que tenemos que tar contentos. Yá-y lo diré yo cuando xuegue col Real Madrid. En fin, lo que digo, a ver si vien aína l’iviernu y la xente ponse a trabayar o a lo que-y pete, pero en silenciu. Yá sé que soi un aguafiestes, pero ye lo qu’hai.
