A vueltes col Muro de San Llorienzu: Encárgase la prensa de recordanos cuántos planes se lleven fechos nesta ciudá al rodiu del Muro. Munchos. Agora, a piques de finar el mandatu, prósimes les eleiciones municipales, el gobiernu municipal de Foro presenta unu nuevu. Infografíes, semeyes futuribles que nunca nun se cumplen, soterramientos, una riestra de pérgoles a lo llargo l’acera… Como digo siempres, opinar ye gratis, y agora toos nos tornamos «tertulianos» (que tien nome d’emperador romanu) p’asitianos a favor o a la escontra del posible plan «moriyoniensis». El dichu plan tien un xacíu esclusivamente ornamental. Quiero dicir, y digo, que nun vien a solucionar nengún problema de tráficu (el tráficu ye fluídu pel Muro), nin representa ganar más tiempu de sol, esi sol que nos quitaron nos años 60 aquellos alcaldes y constructores sinvergüences que ficieron, o consintieron en facer, esos «mamotretos» d’estructures descomanaes. ¿Paga, entós, la pena, pa -supuestamente- enguapiar el paséu pensar en toa esa obra que va a costar unes cuantes decenes de millones? Dicen qu’hai perres, pero eses perres podríen emplegase en cubrir dalguna de les munches necesidaes sociales de la ciudá. y si nun saben cuáles, que-y lo entruguen a Cáritas, la Cruz Roxa o la Cocina Económica. A min sóbrenme toes eses pérgoles, que yá fracasaron n’otros tiempos, y tolos demás obstáculos que s’emperren en poner en mediu les aceres y los paseos. Y una cosa que naide paez tener en cuenta. ¿Dalguién pensó nes alvertencies que se tán faciendo sobre los efeutos del calentamientu global nes zones costeres? ¿Na xuba del nivel de los mares al calentar la temperatura del agua? Yá tamos viendo cómo cada añu les marées causen más estrozos non sólo nel Muro, sinón nes cais que lu arrodien. Y mientres n’otros llugares tiéndese a reforzar les muries y espigones, equí queremos facer un paséu de piruleta. En fin que, polo menos yo, nun toi pol llabor.
Que lo diga onde correspuende: El Secretariu xeneral del PSOE, don Pedro Sánchez, fai unes declaraciones al
periódicu «El Comercio» onde fala del sectarismu de Rajoy escontra Asturies, y de cómo favorez a Galicia, por exemplu nel tema de l’autopista del mar. Critíca tamién les poques perres que s’empleguen nel AVE asturianu, la necesidá de que’l Gobiernu del PP invierta na Zalia y nos accesos d’El Musel. Too ello paezme mui bien. Lo que digo ye que toes eses coses que diz a un periódicu asturianu, prósimes les eleiciones, tenía que diciles onde corrrespuende: nel Parllamentu español. Ellí ye onde hai que-y reprochar al Presidente del Gobiernu l’abandonu d’Asturies. Pero nunca sentí una sola pallabra en favor de la nuestra tierra en boca, nun sólo del señor Sánchez, sinón de nengún de los parllamentarios escoyíos por Asturies pa representala. Porque, ¿qué valor tien que venga a la nuestra casa a dicinos coses que yá sabemos? Onde les tien que dicir, repito, ye nel Parllamentu español, y ellí siguimos tando güérfanos de padre y madre. Asina que menos propaganda y a engañar a otra parte.
En Xixón la Selmana Santa funcionó como una máquina tragaperres: too fueron ésitos multitudinarios. Les mariscaes de la Feria de Muestres. La Primera sidre l’Añu, nel pueblu d’Asturies. Los mercadillos de Begoña, el Muelle y otros cuantos sitios. Hoteles enllenos, etc. Pero, al mio xuiciu hai que tener en cuenta un aspeutu al que nun se presta atención. Toa esa xente que va a esos llugares estratéxicos, y zarraos sobre sí mesmos, ye a costa de quitala d’esos otros comercios que formen los verdaderos comerciantes de Xixón. Los que tán equí tol añu, nun sólo nes fiestes. Los que paguen relixosamente los sos impuestos y cargues munipales, autonómiques y estatales. Los que faen verdadera ciudá. Y encienden los escaparates pa dar lluz y ambiente. Ya iluminen y adornen les cais nes Navidaes. A esos hai que los curiar un poco más, porque con tantu «eventu» concentráu n’otres partes, la corexa se resiente nunes époques en que podíen ganase cuatro perres. Y conste que yo nun tengo negociu, ¿eh?
