Agora, yá cellebrada la Semana Grande xixonesa petezme escribir dalgo sobre’l mio pueblu, nel que nací y nel que, con delles escases ausencies, vivo. Llevo tiempu sintiendo na radio y nos papeles modes y espresiones que nunca na mio casa, ni na de mios pás se sintieron. Nin na de los amigos de la mio quinta, porque ésti ye un tema que comentamos muncho. Esto nun quier dicir que lo de mio seya meyor o peor, nin que les coses, como les modes, nun cambien. Yo sólo digo cómo lo sentí y llueu que cada cuál diga lo que quiera, como tien de ser.
Por principiar por dalgún sitiu fáigolo, precisamente, pola Semana Grande. L’otru día dicía n’El Comercio Xuan Bello, nesos prestosos artículos de la última páxina, que por qué nun-y cambiaben el nome a la Semana Grande pol que siempre fue más popular, el de la “Semanona”. Bueno, eso nun ye asina. En mio casa siempres se dixo la Semana Grande, o les Fiestes de Begoña, y eso de la “Semanona” ye un inventu reciente sacáu, creo que por Pachi Poncela, nun de los Pregones col aquel de facer gracia. Nun sé si se tendrá fecho popular, pero dende llueu l’inventu ye d’antiayer. Y ye que en Xixón hai munchos aumentativos y diminutivos (la Escalerona, el Rinconín…) pero non a tolo grande se-y aplicó l’aumentativu, nin a lo pequeño l’otro. Si non, a la Feria de Muestres llamaríamosla la Feriona, a la Universidá Llaboral la Llaboralona, o a la playa San Llorienzu, por comparanza coles otres playes del conceyu, la Playona. O seya que vamos dexar la Semana Grande, o Fiestes de Begoña, como ye de tradición y muncho más prestoso.
Ya tengo falao del tema de los “playos”, como dalgunos quieren llamar a los xixoneses. Non, playos son los de Cimavilla, el restu caún del so barriu. Por cierto, que tamién comenté la rivalidá qu’había de rapazos ente los “playos” y los “areneros”, cuando s’enfrentaben al fútbol el Cimavilla, d’aquel gran Bastián que metía los goles a pares, y l’ Unión de la Arena, de Santinos, Gorostiza, Ron y Ceínos. Por poner un exemplu lliterariu, don Xosé Napoléon Acebal, l’ilustre autor de “Los trataos” o “El camberu ensin les truches” yera playu (de la Cai Recoletas), pero don Xuan Junquera Huergo, el padre de la primer gramática asturiana, yera “Reborianu” (de La Reboria) y vivió na cai Corrida. Nun yera playu.
Emperráronse n’inventanos un Himnu pa Xixón, el famosu “Gijón del alma”, compuestu creo que por Victor el de Cimavilla (esi si
ye playu). En primer llugar Xixón nun necesita nengún himnu pa sentinos parte d’una ciudá, nun faigamos como los americanos que, como son un de cada casa, gárranse a la bandera como a una tabla salvación pa sentise xuníos. Y llueu, el “Gijón del alma”, con una musiquina un poco d’habanera, tien un lletra perronera, con eso de “las chavalinas” y toa esa señaldá incorporada, propia pa foriatos con gana volver, como pasó col otru himnu, l’”Asturias, patria querida”, tamién inventáu allende los mares. Xixón yá tien otres guapes canciones dedicaes, como la del Presi: “Dende l’altu l’atalaya, yo contemplo’l mio Xixón…”, la guapísima “Bello es Gijón, puerto hermoso…”, o la habanerina “Xixón, Xixón, Xixón, onde yo nací baxo un cielu d’estrelles, playa onde yo aspiré, etc, etc”, por poner dellos exemplos. A propósito de la del Presi, equí llamábase a lo alto de Cimavilla “l’Atalaya”, y non el Cerro, como paez que se vulgarizó agora.
En Xixón, de tiempu, hubo munches romeríes, polo menos una por barriu y otra por parroquia. Y siempres fueron eso, romeríes, non esa cosa inventada de “fiestes de prau”. Y equí podemos dir a tomar unes botellines de sidra, o unos culinos, y nunca fuimos “de sidras”, copia xabaz de lo de “ir de vinos” o “de copas”. ¿Y qué dicir de lo de Playa de Poniente? Esi inventu de dalgún antiguu conceyal de (in)cultura, veníu seguramente de Benidorm a bautizar una zona yá bautizada: Playa de Pando, Playa del Natahoyu… Otru día, más.
