Nomáu como’l meyor llibru de deportes de tolos tiempos pola revista «Sports Illustrated», en 2002, «La dulce ciencia» atropa nun únicu y prestosísimu volume les clásiques pieces del periodista del New Yorker A.J. Liebling sobre boxéu: esa «Dulce ciencia de los moratones». L’autor fue tou un personaxe. Nacíu en Nueva York en 1904, fue periodista en dellos periódicos importantes, inclusive nel New York Times, del que lu echaron nun sé mui bien por qué, y vivió un tiempu en Francia. Mientres la Segunda Guerra Mundial trabayó como corresponsal de guerra y firmó munches cróniques dende África, Inglaterra y Francia. Tuvo nel desembarcu de Normandía, na playa que los americanos llamen «Omaha» y entró en París cuando fue reconquistada. Liebling algamó la Cruz de la Legión de Honor poles sos cróniques de guerra que tien publicaes en «The road back to París». Otra vuelta nel so país, fue un duru críticu escontra’l «macartismu» y el Comité d’Actividaes Antiamericanes. Gran aficionáu al boxéu y a les carreres de caballos, fízose famosu colos sos artículos sobre lo que llamó «La dulce ciencia de los moratones».
Nesta recopilación de los sos trabayos l’autor fálanos de los años doraos del boxéu, que’l asitia na década de 1950, enantes de que se televisaren los encuentros, porque como diz, quién va a allegase, lloviendo y con fríu, hasta un de los antros onde se celebraben los combates, pudiendo velos en casa, calentín y gratis. Pero les cróniques de Liebling nun recueyen solo los combates ente los meyores: Joe Louis, Rocky Marciano, Sugar Ray Robinson o Archie Moore, sinón que tamién nos ufierta una güeyada sobre la historia humana que ta detrás, l’orixen (humilde, na so mayoría) de los combatientes, los entrenadores veteranos, los cucios representantes y tou tipu de personaxes qu’abeyen pelos ximnasios y los llugares de les pelees, dende un garaxe nos barrios baxos hasta’l glamour del Madison Square Garden onde, depués del combate, Liebling diba a tomar una pinta y a charrar colos aficionaos.
Testigu de primer mano d’aquellos años de barru y trunfu, ye una delicia lleer les sos cróniques inclusive pa una persona como yo que nun soi mui aficionáu al boxéu. El llibru fina cuando’l gran Cassius Clay entamaba, entovía-y dio tiempu a velu debutar nel Madison y entrevistalu a la fin del combate. Cassius taba mui enfurruñáu porque lu recibieron con pitos, pero Liebling caltenía que lo que pasaba yera que a la xente del boxéu nun-y gusta la poesía, bromiando sobre dalgún poema (bastante malu, por cierto) que Cassius Clay publicaba na prensa enantes de los combates. Diba un poco de sobráu, y eso a la xente nun-y prestaba. A.J. Liebling morrió nel añu 1963, a los 59 años. Por fin cumplió una fras que siempre dicía: «El boxeador, como el escritor, debe estar solo».
