Nun ye normal que a una persona que-y presta tanto la llectura –falo de min, claro- nunca-y diera por lleer un clásicu de la lliteratura universal como ye “Germinal”. Porque la novela d’ Émile Zola ye l’esponente másimu de la narrativa minera y a ún que vive nun País mineru, anque ensin esperiencia familiar na profesión, nun-y debiere ser ayeno nada de lo que cinca a esi tema.
Émile Zola (París, 1840-1902) fue un intelectual francés, un notable escritor y un paisanu comprometíu cola sociedá del so tiempu. Amigu de dalgunos de los más notables pintores impresionistes, fustigó a los políticos, militares y xueces de la so patria col famosu “Yo acuso” en defensa del militar Alfred Dreyfus xulgáu inxustamente como espía. Por ello tuvo d’esiliase a Londres. Como escritor destacó pol so “naturalismu” y el vigor de les sos noveles, refugáu por una parte de la sociedá parisina.
De “Germinal” dizse que ye la historia d’una güelga minera, pero en realidá ye muncho más qu’eso. Yo dividiría la obra en tres partes, mui rellacionaes pero que s’estremen nidiamente. Hai una primera na que se trata de la mina y del mundu de los mineros. L’autor describe con detalle cómo yeren aquelles mines del sieglu XIX y cómo yera’l trabayu que teníen que desendolcar los mineros. Y habría que matizar, los mineros y les mineres, pues dambos trabayaben nel interior de les galeríes picando’l carbón y sacándolu al esterior. Fala tamién Zola nesta primer parte de los poblaos mineros y cómo yera la vida ellí, coles miseries qu’arrecostinaben, la fame y l’apinamientu de la xente que vivía y dormía nun “totum revolutum”. La segunda parte ye, en sí, la historia de la güelga que duró varios meses y finó cola derrota de los trabayadores, anque los propietarios tamién salieron mal paraos. Hai a lo llargo d’ella cantidá d’escenes dramátiques que l’autor trata en tola so dimensión, ensin aforranos detalles macabros. Y ún nun dexa de lleer, col corazón primíu, el cruel destín d’aquella xente que percorría pueblos y carreteres col gritu de: “¡Pan, pan, pan…!” que yera la so primer necesidá. Y hai, por fin, una tercera parte que ye la pos-güelga onde se ve que, nel fondu nada cambió anque Zola dexe una puerta abierta a un futuru meyor na figura del protagonista.
Los personaxes tán mui bien dibuxaos y, anque son un poco “estereotipos”, vemos la evolución que van teniendo a lo llargo la historia. A destacar tola familia de los mineros Maheu, que terminen siendo cuasi como la nuestra propia familia y sobre too la desdichada Catalina, mocina de 16 años que trabaya na mina como unu más y conoz el maltratu de manes d’un desgraciáu de paisanu. Tamién Esteban, el protagonista, que camienta que va a ser quien lidere un movimientu de lliberación de los mineros y fina siendo’l responsable -indireutu- del so infortuniu.
Novela dramática, cuya llectura te dexa una fonda buelga y na que sigues pensando tiempu depués de tenela terminada. Al que nun la lleere tovía, que lo faiga. Y al que lo fizo va tiempu, que la refresque. Nunca ye tardi pa ello.
