«El Rey Lear» ye una de les más dramátiques traxedies de Shakespeare. Anque la qu’aportó hasta nosotros tien la firma del gran William, la lleenda del soberanu de Bretaña que divide’l reinu ente les sos tres fíes y los maridos, que llueu se vuelven escontra elli, ye patrimoniu de diverses cultures, y toca temes importantes como la ingratitú de los fíos, la vieyera o la llocura.
Con eses blimes y otres munches d’aportación propia, la escritora norteamericana Jane Smiley (Los Ángeles, California, 1949) fai una mui personal interpretación de la obra, treslladándola al Estáu de Iowa y a una época moderna. Un vieyu agricultor y ganaderu, viudu y de mal carauter, decide un día, ensin muncha desplicación, dividir les sos tierres ente les tres fíes que tien: Ginnie, Rose y Caroline y les sos pareyes. La pequeña, renuncia a la so parte de la herencia y eso va dar llugar a una rempuesta enritada por parte de Larry, el padre, que pretende desheredales a toes y recuperar la propiedá. Ési podría ser el resume del argumentu no que cinca a la lleenda primitiva. Pero «Herederás la tierra» ye muncho más qu’esa cenciella historia sobre la que se desendolca la traxedia. Jane Smiley esplora na so novela les complexes rellaciones ente un padre tiránicu, la so muyer y les sos fíes. Una rellación que va muncho más allá de la paterno-filial acostumada y que va a dexar una fonda fuelga, cada una d’un mou distintu, nes tres rapaces protagonistes. Pero tamién la forma de tratase ente les hermanes, los secretos qu’escuenden, la so rellación coles pareyes… pasen pol visturí de l’autora californiana, esperta estudiosa de la personalidá humana. Asina, la tenrura y la violencia, l’apegu a la tierra, la llealtá, la enfermedá, los amores y la maternidá frustraos, los intereses llexítimos y espurios, la muerte, a la fin, crucien les páxines d’esta interesante novela dexándonos un tastu de traxedia que, en realidá, nun ye más que la traxedia de la vida del ser humanu, coles sos grandeces y les sos miseries, más d’éstes que d’aquelles. Una novela que me recuerda, pol so estil narrativu, los ecos campesinos y la so resonancia épica, a la gran «Al este del Edén», de Steinbeck, de la qu’en nada desmerez. Non por casualidá llogró algamar el prestixosu Premiu Pulitzer nel añu 1992.
En resume, una gran novela que se llee con interés y emoción y qu’amuesa tola gama de los sentimientos humanos. Quiciás toos menos un, que nun ta mui de moda: la compasión. De llectura imprescindible.
