La perspeutiva, yá cuasi confirmada, de que l’Ilustre Ayuntamientu de Xixón va a regalar/subvencionar 175.000 euros (75.000 más que l’últimu añu) a la Selmana Negra, paezme que bien merez el títulu que nesta entrada-y dedico. Nunca nun se vio que se premie a una entidá privada con ánimu de lucru, por facer mal les coses: deber perres a proveedores de bienes y servicios, y a la propia Facienda Pública. Manda güevos que seyan los amigos de lo Público, los partíos d’izquierdes, col sofitu de una derecha vergonzante como ye Foro, los que-yos saquen les castañes del fueu a una asociación a la que siempre acompañó la polémica. A dalgunos fai-yos gracia esa definición del padre-fundador, Paco Ignacio Taibo II de que La Selmana Negra ye «un parque temáticu pa neños trotskistas». Yo, la verdá, nun-y veo la gracia. Los «neños trotskistas» que vayan a entretenese coles sos perres, non a esperar que, amás de xugar, los mantengamos nosotros.
Y ye que, amás, en Xixón hai otros importantes eventos que tamién necesitaríen sofitu económicu porque, poles perres que se-yos dan, anden agora amiseriaos y a puntu esapaecer. Eventos que sí son públicos, o seya municipales, como’l Festival Internacional de Cine de Xixón, con una trayeutoria consolidada y al que tán a puntu de cargase los partíos opositantes, o el propiu Festival del Arcu Atlánticu, una iniciativa guapísima pa promocionar un comerciu y una cultura na que Asturies siempre se movió dende tiempos inmemoriales.
Ye verdá, y yá lo tengo dicho, que la Selmana Negra trai dalgunes conferencies, presentaciones o esposiciones
d’interés. Taría bueno que nun fuere asina coles perres de les que dispón. Pero tamién ye verdá que too ello podría facese n’otru tipu de marcu más afayaízu, más económicu, y menos molestu. Como exemplu, la BCNegra de Barcelona, qu’aconceya a interesantísimos autores, editores y otres prestoses meses redondes, ensin el enorme gastu y la polémica que siempre arrodió al certame xixonés. Abúltame que 175.000 euros, más otros activos (tarrén, policía, basoria…) ye dalgo que nun debería sofitase colos impuestos de los xixoneses. Anque sé qu’esto ye «dar voces en castañéu».
