close
Dos por dos… cinco

Dos por dos… cinco

2016-09-22570Visitas

llingua-asturiana-anayaSi nun llibru de matemátiques de los que se dan nos colexos viéremos un enunciáu como’l del títulu, fadríemos tres coses: la primera llamar inorantes a los autores, la segunda nun volver a trabayar cola editorial que publica semeyante barbaridá y la tercera denuncialo al colexu y a les autoridaes que lo faciliten pidiendo les desplicaciones correspondientes y la retirada del llibru. Ehí ye nada que los nuestros fíos aprenden nos colexos coses enquivocaes, cómo van andar llueu pela vida.

Paez que cuando la -vamos llamala- metedura de pata o inorancia (pal casu dame igual) ye d’otra materia non numeraria, la cosa nun tien importancia y déxase pasar. Eso ye lo que ta asocediendo colos llibros que se tán dando de gramática onde, nun sabemos que filólogos (polo menos yo nun lo sé) afirmen que la llingua asturiana ye una variante del castellán. Esa afirmación vien a ser l’equivalente del «dos por dos… cinco» mmatemáticu porque denota una inorancia supina de los autores y de la editorial que los publica.

Nun sé que me fadia más del asuntu, si la inorancia, la desfachatez o’l despreciu a tou un pueblu que caltién una llingua milenaria, semada de documentos xurídicos, políticos, lliterarios (orales y escritos) dende’l propiu Reinu d’Asturies hasta los nuestros díes. ¿Qué ye, que naide se toma’l trabayu de comprobar si les afirmaciones que se dan nos llibros qu’estudien los nuestros rapazos son ciertes o falses? ¿Qué ye, que nun hai una Facultá de Filoloxía n’Asturies con un bon prestixu ganáu, pa nun consultar esos datos y eses afirmaciones? ¿Nun hai una Academia de la Llingua Asturiana cola que contrastar les opiniones de los inorantes autores del desaguisáu colexal? ¿Qué ye, que nun pue facese nada escontra unes editoriales que mienten y falséen al falar de la nuestra llingua con total impunidá? ¿Y el Gobiernu Asturianu? ¿Nun debería tomar partíu nun casu como ésti, que supón un insultu pa la cultura de nueso? ¿Nun intervendría, por exemplu, el Gobiernu Gallegu si se dixera que’l galego ye un castellán mal faláu que s’usa en dalgunes montañes de Galicia? ¿Pue dicise cualquier cosa ensin que tenga repercusión? Pues dalgo habrá que facer nel futuru. Porque nun podemos tar cruciaos de brazos mientres unes editoriales, en manes d’unos inorantes de mala fe, siguen afirmando que dos por dos son… cinco.