«¿Quies que te cuente’l cuentu de la h.iba-h.aba que nunca s’acaba? Sí. Yo nun digo «sí», yo digo: ¿Quies que te cuente’l cuentu de la h.iba-h.aba que nunca s’acaba?. Non. Yo nun digo «non», yo digo: ¿Quies que te cuente’l cuentu de la h.iba-h.aba que nunca s’acaba?» Y asina «ad infinitum».
Principio esti pequeñu comentariu con una de les «retafiles envolventes» que Severino Antuña y yo recoyimos nel llibru «Garulla. Antoloxía del ritmu», porque ello amuesa mui a les dereches lo que ye eso de los Premios Príncipe d’Asturies: una retafila envolvente. O seya, una repetición, un calcu d’años pasaos onde namás cambien los nomes de los premiaos. De tal mou, que podía escaeceme esti añu d’escribir daqué nuevo, y llantar dalgún de los comentarios que fici anteriormente. Si queréis facer la preba, metéi nel buscador de temes el nome de los premios y veréislo.
Porque nin siquier m’interesa la mayor o menor xusticia de los premiaos, unos años más axustaos qu’otros, sinón un
conteníu que nada nun tien que ver col País que los acueye y cola persona que diz representanos: esti Príncipe de Asturias. N’efeutu, el tal títulu, creáu pol Rei Juan I en 1388 pa tener a Asturies arreyada a la corona y evitar aventures «llevantisques», llévalu dente entós l’heriede de la corona y futuru rei. Fue pues nel so día, más un castigu qu’un premiu pa los asturianos, y abúltame que sigue siéndolo. Porque esti rapaz que lu lleva agora y que da nel nuestru nome la bienvenida a los forasteros, nun tien un sólo detalle p’amosar la nuestra llingua, la nuestra cultura, les nuestres tradiciones, los nuestros escritores… delantre los sos «invitaos». Cuando hai que facer cites, fáiles del Inca Garcilaso o d’Unamuno, cuando hai que falar de solidaridá, valor o otros aspeutos positivos cita a un pueblu gallegu (tres veces), como si equí n’Asturies nun hubiere motivos pa destacar esos valores, individuales o coleutivos, como por exemplu les «muyeres del carbón». Nada nuestro-y interesa. Nunca una pequeña cita de los nuestros clásicos, de los nuestros músicos, de xente que nació y morrió nesa tierra qu’él diz representar, inclusive del mesmu «masuñáu» Xovellanos. Si yo un día fuera a dar un discursu a cualquier parte del mundu (cosa más bien improbable), interesaríame por saber cómo falen, como piensen, cuál ye la so filosofía particular. Al Borbón nada d’eso-y interesa. Val que tea arrodiáu per una «panda» d’antiasturianos que fieden, pero yá ye mayorín pa saber estes coses por él sólu. Eso sí, un día depués, cuando yá la xente importante marchó, y fuera del actu oficial, va a dase «un baño de asturianía» con eso del Pueblu Exemplar. Pa que la xente diga: «‘¡ai, fía, mira que llanu ye!»
En fin, como diz el refrán: «Llava-y la cabeza a un burru ye gastar tiempu y champu», asina que nun voi gastar más tinta. Estos premios namás valen pa que los que llevaron a Asturies a esta fonda crisis económica y social, paséen los sos «modelinos» d’alta costura pa envidia d’esi «pueblu llanu» del «vivan las caenas». El pueblu «acríticu». Hasta tal puntu que, por exemplu, la edición dixital del ABC titula: «Felipe Varela «protagonista» de los Premios Principe de Asturias«. Hai que saber que Felipe Varela ye’l modistu de la Leticia. Con eso nun hai más qu’amestar. Asina que, hasta l’añu que vien, que volverán a querer cuntanos el cuentu de la h.iba-h.aba.
