close
El Gobiernu Asturianu nun ta pa la mano

El Gobiernu Asturianu nun ta pa la mano

2011-03-02Bolos409Visitas

bolos-asturianosNun ye una, nin dos, nin media docena… ¡Ochenta peñes de bolos! son les que glayen, al alto la lleva, escontra la política del Gobiernu Asturianu. Más a les dereches, escontra’l Direutor Xeneral de Deportes, Misael Fernández Porrón. ¿El motivu? Los recortes económicos y la desatención xeneral pa con un de los deportes autóctonos más guapos y mas enraigonaos na nuestra cultura: Los Bolos. Un deporte tradicional que, como tolo nuestro, nun interesa lo más mínimo a unes autoridaes culturales que faen del esaniciu de lo propio los sos signos d’identidá. Da igual que seyan escavaciones arqueolóxiques, que los horros y paneres, que los llavaderos, fontes o caminos, que los bolos o cualquier cosa que pueda goler a asturiano, eso nun interesa. Ye una estorbisa, una antigualla, hai que lo dexar cayer de vieyo. ¡Viva la posmodernidá!

Los Bolos asturianos, amás de ser un xuegu prestosísimu, son d’una riqueza cultural pergrande. Agora que tantu «bombu» ta dándose-y al Bicentenariu del «prócer » Xovellanos, hai que dicir qu’elli valorábalos muncho, como xuegu y como llugar de reunión de los collacios d’una collación o parroquia. En gran parte de la lliteratura asturiana apaecen como marcu de la narración (Palacio Valdés, Pachu’l Péritu, Pachín de Melás…), y tamién na nuestra mitoloxía, como los «bolos d’oru» de les Xanes. Son mui ricos, al tiempu, nes distintes modalidaes a les que se xuega en toa Asturies: La Cuatriada, el Bolu Palma, el Batiente y el Bolu Celta o de Tinéu, toes elles federaes, y otres tantes o más n’otros pueblos o llocalidaes del País (Narcea, Navia, Somiéu, Agones, Cuideiru…) ensin federar. Y depués d’unos años bolos-3d’escurantismu, en que tuvieron nuna fonda crisis, yá va tiempu que remocicaron y hai una xuventú asturiana mui enfotada n’ellos.

Too esto nada nun-yos importa a les autoridaes asturianes, más enfotaes en tirar les perres en proyeutos grandonistes (U. Laboral, Niemeyer, Pistes de Fórmula 1 pa que xuegue Alonso…) que n’atender a estes Ochenta peñes bolístiques, que nun tienen perres nin pa poder desplazase a xugar a les comunidaes vecines, y esto ye lliteral. Yá nel so día la Federación quexóse grandemente de la situación d’aforfugu qu’esistía nel mundu de los bolos, ya inclusive fízolo publico nuna carta al periódicu. De nada valió. Agora son les propies peñes les que lo faen. ¿Valdrá pa daqué? Abúltame que non. Ye la eterna llucha que tenemos entamada pa defender lo nuestro, de nosotros mesmos. Meyor dicho, d’ellos. Porque nun quiero meteme nel mesmu «sacu» qu’eses persones emperraes n’acabar cola cultura del nuestru pueblu. Y camín lleven d’ello. Cuando yo xugaba a la Cuatriada yera bastante malu «pal Pulgar», porque nun yera a da-y bien l’ «efeutu» a la bola. En cambiu nun lo facía mal pa la mano. Pero’l «Gobiernín» que tenemos nun tira nin pa la mano, nin pal pulgar. Lo único que tienen de los bolos ye un tamañu políticu tan pequeñu como’l «biche».

Tags:Bolos