close
Ex libris

Ex libris

2017-07-19147Visitas

Títulu: “Buen trabajo”

Autor: David Lodge

Torna: Esteban Rianbau Saurí

Editorial: Anagrama

Añu: 1988

 

UNA DELICIOSA NOVELA.- Nun ye la primer vez que reseño una novela de David Lodge. Nacíu en Birmingham nel 1935, profesor de Lliteratura Inglesa y reputáu críticu lliterariu, la crítica tienlu encadarmáu neso que se da en llamar “novela humorística” de la que tan abondosa tradición tienen en Gran Bretaña (Kingsley Amis, Malcolm Bradbury, Tom Sharpe…). Ensin embargu, la obra de David Lodge va muncho más allá. N’efeutu, les sos noveles son de les que se lleen siempres con una sonrisa nos llabios, pero la agudeza crítica del autor de Birmingham y la perfeuta construición de los sos personaxes, xunto con una prosa cenciella y, al empar, elegante, faen de Lodge un autor diferente.

Quiciás el tema más queríu por él, de xuro pol so conocimientu de primer mano, ye’l del mundu universitariu, al que-y tien dedicada una triloxía (“Triloxía del campus”) de la cuál esta novela forma parte.

“Buen trabajo” (Nice work) trata del intentu de la universidá por averar el so mundu de los estudios, munches veces nuna especie de “apartheid”, a la vida real, nesti casu al mundu de la empresa, colos sos problemes y les sos formes d’actuar.  Pa ello creen la figura de la “sombra”, un profesor universitariu qu’acompañe a un importante executivu d’empresa en tolo qu’esti faiga, un día a la selmana durante tol cursu. Por circunstancies del guión, la escoyeta recai en Robyn Penrose, profesora especialista en narrativa decimonónica en rellación cola Revolución Industrial, y feminista comencida. Y la persona a la que tien que siguir, como una sombra, ye Vic Wilcox, direutor d’un importante grupu empresarial, home más bien conservador y con pocos intereses culturales al marxe del so trabayu.

La construición de los personaxes ye tan bona que daría lo mesmo la situación na que l’autor los colocare, porque la confrontación dialéctica y l’humor taríen garantizaos. Lo bono de Lodge ye que, amás, nun toma partíu por nengún de los dos. Cuando fala del mundo real, práuticu, colos problemes económicos y llaborales del executivu, fáelo como si él tuviere  razón, como si se punxere de la so parte. Y cuando lo fai de la guapa ya intelixente profesora pasa lo mesmo. Asina, les contradiciones surden porque los supuestos ideolóxicos, y les formes de vida de los protagonistes son dafechamente contrarios, lo cual produz un choque constante que llueu, el tiempu, va a dir peñerando y faciendo ver que les coses nun son nunca blanques o negres del too. Diálogos cultos ya intelixentes, situaciones divertíes… “Buen trabajo” ye una novela que presta lleer y que te dexa como mensaxe, si ye que les noveles tienen que tener un mensaxe, que la sociedá que vivimos ye poliédrica y contradictoria, y que nunca nun se sabe a ónde puen llévate les tos convicciones. Llectura recomendada cola seguridá d’acertar al cien por cien. Si non, devolvemos el dineru.
Semeya: Joel Kaplan