Nun quixe escribir hasta agora sobre’l tema del socialismu xixonés y el so percorríu humanu y militante. Nun voi dicir que fuere un tema que me resultare ayenu, porque tienen nes sos manes los destinos de munchos temes vitales pa la ciudá (nun toos, gracies a Dios), pero prefería tar sollerte a ver en qué acababa l’enguedeyu nel que se teníen metido pa tener tolos datos na mano y poder falar d’ello.
Un percorríu que principió cola defenestración d’una alcaldesa, con ínfules de querer siguir, y finalizó col nomamientu como candidatu d’un «non afiliáu» y ensin nenguna esperiencia en política. Va unos meses naide s’atrevería a pensalo. Siempre manifesté, y equí tán les entrades nesti blogue pa confirmalo (abasta con poner nel «buscador» el nome), que doña Ana González nun yera la persona que debía rexir los destinos de la nuestra ciudá. Dalguién qu’entró metida con calzador, depués de fracasar como Conseyera d’Educación, ensin conocer Xixón, la so historia, los sos personaxes, el calter de los xixoneses, nin siquiera les cais, como yá comenté nuna aneudota que viví en primer persona. Poco dialogante, siempre falaba «al sabor de la boca», irreflesivamente y de mou dictatorial. En fin, como yá quedó dicho n’anteriores entraes nun quiero volver a repitime (anque toi faciéndolo). Hasta los propios «correlixonarios» lo atalantaron asina y d’ehí, pese al so enfotu en volver a presentase, el descabalgamientu al que me refería al empiezu. La pena ye que nun puedan echar tamién al so compañeru de «correríes», esi d’I.X. que-y dieron una gorra y un xiblatu y tomaba toles decisiones, y cuasi toes enquivocaes. A ver si nel so partíu pasen tamién «la garlopa».
Pero, amás de correxir el percorríu, vamos llamar «erráticu», de l’alcaldesa, la decisión que tomó l’Agrupación Llocal del PSOE de Xixón dexó al descubiertu una fonda división cola Federación Socialista Asturiana (¿pa cuándo Partíu Socialista Asturianu?). Lo que podemos llamar «l’aparatu» del partíu, encabezáu por don Adrián Barbón y doña Delia Losa. El primeru, que dixo que nun quería «baruyos» en Xixón y que sofitó a les dos perdedores, primero a l’Alcaldesa y llueu a la señora Puerto, rival del candidatu del PSOE llocal, Luis Manuel Flórez «Floro». Y la segunda, la señora Losa, Delegada del Gobiernu, y mundialmente reconocida pola so incontinencia verbal. Una división, pues, de la que l’agrupación encabezada por Monchu García salió trunfadora por goleada. Baltió a l’alcaldesa y asitió como candidatu a un home de la so confianza. Plenu total.
Metanes de too esto está «el non afiliáu». A «Floro» conózolu dende va munchos años, cuando me fizo pasar por les tres estancies que tenía nel Proyeutu Home (la de Xixón, la d’Avilés y la d’Uviéu) pa falar de la Llingua y de la Cultura asturianes. Tres charres mui emocionantes sobre too la d’Avilés, conviviendo con aquelles persones que lluchaben con enfotu pa salir d’esi mundu alloriante de la droga. A esti altor de la película naide puede negar el gran papel que xugó «Floro», la so capacidá dialogante y el so trabayu pa colos desfavorecíos. ¿Ye ésti suficiente equipaxe pa ser alcalde de Xixón? Pues nun lo sé. Pero lo que sí sé ye que la materia prima esiste y que, arrodiáu de bonos collaboradores que nun seyan «impuestos», pudiere selo. De toes formes toi mui contentu de la so eleición pol PSOE llocal como candidatu. Y dicir que’l que quiera derrotalu nes eleiciones del prósimu añu va a tener que trabayalo muncho. «Floro» ye muncho «Floro», y el carisma nun te toca nuna tómbola.
