Acaba firmase en Granada, per parte del Conseyu Territorial del PSOE, un documentu nel que se marquen les llinies mayestres de lo qu’ellos van defender de magar agora: un cambiu de la Constitución que de pasu a una España considerada como un Estáu Federal. Nun conozo’l documentu na so totalidá, anque paez una cosa poco seria pues, pa un tema capital como ye esti, despáchenlu con un manifiestu de malpenes ocho folios. Agradezse la condensación, pero nesi espaciu ye imposible falar en serio d’esti asuntu.
En cualquier casu, dalgo salió recoyío nel diariu El País y a ello me remito. Como siempre, l’illustre diariu madrilanu sigui coles sos pantasmes catalanistes y lo que-y interesa daveres ye a ver cómo son a aparar la deriva independentista de los dirixentes catalanes, pa lo cuál val-yos cualquier cosa. Pero de lo que comenten del documentu del PSOE hai coses que los representantes asturianos deberíen desplica-y al pueblu astur. Quiero creyer, claro, que dichos representantes, o seya la FSA, tuvo presente na firma d’esi documentu y dexó oyer la so voz al respeutu de lo qu’ellí s’aprobó. Y ye qu’una de les frases que se dixeron, y aprobaron, fue al rodiu del «respeto a las identidades diferenciadas». Y más alantre a cerca de «los hechos diferenciales y las singularidades políticas». Y yo, humildemente, entrugaría a los representantes asturianos de la FSA si, según ellos, Asturies s’alcuentra ente eses identidaes diferenciaes, y si somos un fechu diferencial cola nuestra propia singularidá política. Porque la so rempuesta ye vital pa que’l pueblu asturianu se posicione a la hora de da-yos el votu, o non, nel momentu nel qu’haya que votar. Primero la reforma de la Constitución, nel sen en qu’ellos dicen, y depués nes elleiciones al Parllamentu Federal. En resume: pa los socialistes asturianos, Asturies ¿ye o nun ye una identidá diferenciada? ¿Ye o nun ye un fechu diferencial con singularidá política? Que nos lo digan ensin engañifes nin medies pallabres. Queremos saber dafechu lo que piensen. Depués obraremos en consecuencia. Porque a la hora de dibuxar el nuevu Estáu, nun va a ser lo mesmo una cosa qu’otra. ¡Ah! y una cosina más: que nun empleguen nengún argumentu sobro les comunidaes con llingua oficial, porque esi ye un tema que depende d’ellos.
