close
Pingarates viaxeres

Pingarates viaxeres

2009-09-27viaxe a italia421Visitas

Si dalgún curiosu (y ociosu) pasó les caberes selmanes por esti blogue, vería que lleva allancáu dende va tiempu. Y ye qu’esti que lu trabaya anduvo de folgueta. Enantes d’entamar otra vuelta coles mios hestories, voi poner en forma de pingaratines dalgunes impresiones d’esti viaxe pel mediterraniu, mayormente Italia:

RAIMON.- Lleo na prensa valenciana que, depués de 9 años, vuelve’l cantautor Raimon a actuar nun pueblín de la comunidá. El cantante de Xátiva lleva toos esos años ( y dalgunos anteriores) VETÁU pola Generalitat Valenciana pa trabayar nos circuitos oficiales y fáilo agora, invitáu por un ayuntamientu de pueblu, con motivu de los 50 años de la so canción mítica «Al vent». Digo lo mesmo que nel casu de Paco Ibañez: qué poca memoria tien la xente y que mal se porten con persones que tanto ficieron pola llegada de la democracia a esti país.
NIZA.- La costa azul francesa ta percuidada y Niza relluz baxo les faroles del paséu marítimu. La mar ta picada. Paez que tamos en San LLorienzu.
VERONA.- A los veroneses nun-yos facía falta inventar lo del «balcón de Xulieta» pa engrandar el turismu. Ensin montescos nin capuletos la ciudá ye tan guapa qu’atrae por sí sola.
VENECIA recíbenos con un pergrande «bastiazu» que dura hasta pela tarde. Dicen que la lluz, nesos díes, ye mui especial. Debe selo, pero yo prefiero la lluz de siempre.benidorm-e-italia-085
FLORENCIA fizo plasmar a Stendhal y, supongo yo, a muncha otra xente. Pero nun se pue entrar «a sacu» nos bolsos de la xente, nin ufiertar visites que llueu nun cumplen les espeutatives. «La Santa Croce», enllena d’andamios y cola mayor parte tapecida embaxo lones, nun pue abrise al turismu y cobrate la visita normal. Claro qu’un paséu pola Piazza de la Señoria resárcete de too ello.
Nun pue haber más guapura en menos espaciu, y PISA ábrese, una vuelta más, a los güeyos foriatos como lo que ye: la octava (o novena, o décima…) maravía del mundu.
La Universidá de PADUA taba a tope. Taben colos esámenes de setiembre y esi ambiente estudiantil contaxa a la ciudá d’un aire frescu y cosmopolita. Al llau, nel mercáu de frutes, compramos unes riquísimes peres d’agua. Sedría un bon sitiu pa vivir.
ROMA siempre sedrá Roma, anque tea puerca y mal illuminada. El númeru de xaponeses per metru cuadráu aumenta con respeutu al restu’l país. ¡Manda madre! ¿Quedará la islla desierta? En Trevi tiramos una moneda y pidimos la Oficialidá, debe ser yá l’últimu recursu que nos queda. Caleyar per Roma ye tar siempre abiertu al descubrimientu.
Los qu’estudien Hestoria nun puen dexar de dir a POMPEYA, lleción viva de ciudá romana. Y los que nun estudiamos, tampoco: Termes, tiendes, pasos «cebra», palacetes, prostíbulos… Teníen que nos dar una túnica a la entrada.
El viaxe en barcu de Roma a Barcelona ye mui placenteru. Dicen los de GRIMALDI que ye cuasi un cruceru, y sedríalo dafechu si nun fuere pela «prepotencia» de dalgún sobrecargu y dalgún emplegáu de cara «bugre». Con too, fáise’l viaxe curtiu. Y yá más nada. Agora a currar, que yá va siendo hora.