Tuvi viendo l’últimu partíu del Sporting que lu enfrentó, esti domingu, al Mallorca: otru equipu históricu con munches campañes en Primera División, anque agora tea n’hores baxes. Gracies a Telecable suelo ver dellos de los partíos de los que’l maestru Carantoña llamaba «los jóvenes atletas del once local«, y a cambiu de bon fútbol, siempres valoro el carauter d’esti equipu fechu con xente mozo que vien de la cantera.
Pero vistu’l partíu d’ayeri, hai que valora-y daqué más que’l carauter. Escontra’l Mallorca, el Sporting fue un equipu que supo a qué xugaba. Bien posicionáu nel campu, lo que s’amuesa en dos detalles: Primeru, cuando un rival va a recoyer el balón, tien a tres xugadores sportinguistes al rodiu d’él torgándo-y la salida. Segundu, la mayoría d’eso que se llamen «segundes xugaes», yeren siempres pal Sporting. Una defensa mui seria, xuegue quien xuegue y falte quien falte, como lo canten los poquísimos goles encaxaos, y nella incluyo, claro, al porteru, o meyor a los porteros, tamién intercamudables. Y destacando penriba de toos esa xoya de central llamáu Bernardo que nun entiendo como nun ta yá nun equipu de Primera. De mediu campu p’alantre trabayando toos, presionando la salida del balón y zarrando les víes de pase. Y ehí un xugador seriu y calláu que ye una máquina de cortar balones y pasalos en bones condiciones, como ye Sergio. Xunto a él, la gran calidá de Nacho Cases que, amás, nunca s’entretién col balón nos pies, tolo contrario que Carmona, xugador de muncha calidá al que siempre-y sobra dalgún regate. Y lo peor, como yera d’esperar, el remate. Guerrero, bon xugador, agótase na presión a los defenses. Pablo Pérez, que tien unes «maneres» espléndides, ta mui verde. Jony principió mui espectacular, pero fue perdiendo fuelle y agora nun desborda. A min préstame muncho Carlinos Castro, con gran olfatu de gol y que se mueve nel aria con habilidá. Falta-y serenase un migayu, pero ehí hai xugador de futuru. Y esi rapacín de diecisiete años, defensa central, que paez que lleva venti años d’esperiencia. Too ello gracies a un bon entrenador, como ye’l «pitu» Abelardo, que ta faciendo milagros coles blimes que tien.
Nun suelo escribir del Sporting más qu’a la fin de la temporada o en dalguna ocasión señalada, pero quiero facelo agora porque pudiere ser que, cuando termine la lliga, nun tuviéremos la recompensa del ascensu. Sentiríalo, y poro quiero felicitalos yá agora, pase lo que pase, porque paezme que lo merecen y sería inxusto nun poder facelo más llueu. Asina que: Norabona, rapazos, tais faciéndolo mui bien… anque nun lleguemos «al cielu».
