close
Taba yo planchando…

Taba yo planchando…

mayte-martinTaba yo planchando esti día y teníalo complicao pa escuchar música curiosa. Nun sé qué demónganos-y pasa al mio «aparatu reproductor» (vamos, non al míu exautamente…) que falla más de lo que debiere y namás reconoz los CDs que-y gusten a él. Total, que llevaba unos díes teniendo que sentir siempre los mesmos. Asina que saqué un de los de más abaxo de la pila y púnxilu cuasi ensin mirar el conteníu. Por una vegada, el «repro» y yo tuviemos d’alcuerdu: aquel discu yera preciosu. Y como me presta compartir les coses guapes, voi dicivos cual yera. Titúlase «FREE BOLEROS», o seya, Boleros Llibres y daveres que lo son. Ye un conciertu del añu 1996 nel Festival d’estíu de Barcelona nel GREC. La voz ye la de la maraviosa Mayte Martin (que tamién canta flamenco). Al pianu el meyor «jazzista» español, Teté montoliuMontoliú. A la percusión Nan Mercader y al contrabaxo Horacio Fumero. Ye un poker d’ases. Mayte frasea los boleros cola so voz, un poco nasal, como si acabaren d’escribilos pa ella. Cántalos, cuéntalos, interprétalos. Na so recreación suénennos nuevos los temes de Manzanero («Adoro», «Contigo aprendí», «Mía»). Nun echamos de menos a Lucho Gatica en «El reló». Y elevámonos maxestuosamente un par de centímetros del suelu sintiendo «Nostalgia», «El día que me quieras» o «Contigo en la distancia». Nos momentos en que Mayte nun canta, Teté adórnase y esfruta dexando correr los deos pel tecláu y amosando el porqué de la so fama. Diome pena tener poca ropa pa planchar, pero como taba solu en casa, sentéme delantre la mesa la cocina y dexé pasar el tiempu hasta llegar al final del conciertu. Nun tuvi nengún remordimientu de tar perdiendo’l tiempu. Lo malo ye qu’agora voi tener que tar poniéndolu una temporadina, porque abúltame que’l «repro» nun va a dexame cambialu.