close
Unes xornaes perinteresantes

Unes xornaes perinteresantes

2020-01-18163Visitas

El ser asturianu, como’l ser de cualquier otru sitiu, debería acarretar l’interés por tolo d’uno. Lo que lu rodea, claro, pero tamién l’equipaxe que lleva consigo. D’ónde venimos, y cuál ye la nuestra identidá como coleutividá, y como País. A min, polo menos, ca día m’interesa más el nuestru pasáu, quiciás porque’l presente ye  abondo murniu a tolos niveles y del futuru yá nin te cuento.

Poro, paécenme perinteresantes les xornaes que s’entamaron esti día nel salón d’actos de la Biblioteca Xovellanos, col nome xenéricu de «La génesis del cristianismo en Asturies». Cinco conferencies impartíes por verdaderos especialistes ente los que se cuenten profesores d’Historia Antigua y Medieval, teólogos y arquéologos. Trátase de ver quién y cómo introduxo la relixón cristiana ente los antiguos pueblos ástures, ónde prendieron los primeros centros del cristianismu, y llueu los siguientes, qué clas de cristianismu yera (delles veces heréticu) y cómo convivió coles relixones natives, mayormente animistes, que profesaben los nuestros antepasaos nesta tierra que pisamos.

La primer conferencia corrió a cargu del Caderalgu eméritu d’Historia Antigua don Narciso Santos Yanguas, que defende la teoría de que’l cristianismu lu traxeron los militares romanos provinientes del Norte d’Africa, recordando que’l centru relixosu más importante nun taba en Roma, sinón en Cartago, onde l’obispu Ciprianu yera’l que mandaba y el guardián de la ortodoxa. Afitáu principalmente nes urbes importantes, y dao que na Asturies Tresmontana non les había, nesta parte de la cordillera el cristianismu tuvo un carauter rural. Desaminó los restos epigráficos atopaos n’Asturies y llegó a unes determinaes conclusiones al respeutu.

El restu les conferencies qu’entama l’asociación Candela (Círculo de amigos y nativos de la Abadía de Cenero), cellebraránse cada vienres, a les 7 en puntu de la tarde, nel mesmu llocal de la Biblioteca Xovellanos de Xixón. Y paezme que ye un bon encontu pa conocer el nuestru pasáu que, anque dalgunos nun quieran, condiciona dafechamente’l presente que somos. Recomiéndolo, claro.

Nota.- Na semeya d’El Comercio, Amalia Trancho Menéndez (Coordinadora), Ángeles Fernández González (Direutora del Aria de Formación Continua d’Estensión Universitaria) y el caderalgu eméritu don Narciso Santos Yanguas.