close
Verde que te quiero verde

Verde que te quiero verde

2020-06-30ecoloxismu.Los Verdes363Visitas

Podría valir esti guapu versu de Lorca pa retratar l’actualidá que nestos momentos manda n’Europa. Lo verde. Los Verdes. Nun ye nuevu ‘l nome, pero igual sí el mensaxe. Dende que tengo memoria democrática (entiéndase memoria en democracia) siempre hubo n’España un partíu, grupu o grupúsculu que firmaba con esi nome. Principiaron siendo dalgo residual, inclusive sospechoso, porque nun se sabía mui bien qué querían nin a quién representaben. Abúltame que nin ellos mesmos lo sabíen, y d’ehí esa trayeutoria errante de dir unes vegaes solos y otres arreyaos a otros partíos que, lo que pretendíen, yera utilizalos de floreros. Apaecíen nes llistes d’esos partíos, pero en puestos residuales y ensin nenguna posibilidá de tener un pesu específicu nin llevar alantre nenguna política propia. Yeren como aquelles orquestes de los pueblos nes que figuraba “Fulanitu de Tal… y los Verdes”. El que mandaba yera Fulanitu de Tal.

Esto nun pasaba en dellos otros países nos que’l mensaxe ecoloxista, d’una economía daveres sostenible, y non esa frase masuñada que tanto les izquierdes como les dereches empleguen, diba tomando cuerpu ya importancia. Y digo lo de la frase masuñada porque pa qu’una economía seya de verdá sostenible ye preciso camudar el modelu productivu y eso ye mui gordo pa que, ensin cinismos, lo aceuten los partíos tradicionales. ¿Poner dalgunos remienducos? Val. Pero ensin cuestionar un capitalismu consumista ya inútil que se carga al mundu como se ta denunciando cada día nos periódicos. Y eso que los periódicos, a nun ser dalgunes esceiciones, son tamién parte del sistema.

El casu ye que nes últimes eleiciones municipales franceses ganaron Los Verdes, y eso ye perimportante y novedoso, polo menos con tanta rotundidá. Y n’Alemania la Merkel yá ta falando d’un “pautu verde”, poniéndolo como basa, como sofitu d’un nuevu desarrollu européu que ye imprescindible que vaiga per esi camín si nun quier despeñase nun plazu curtiu de tiempu.

Igual sería llegáu yá’l momentu de que n’España esos ecoloxistes que nunca nun pudieron o supieron facer trescender el so mensaxe, aprovechen esta “mareona verde” pa facese notar a la hora de la toma de decisiones polítiques, como un partíu dafechu o nuna verdadera coalición onde seyan a esparder les sos idees. Ya tuvo bien de ser la “banda” de Fulanitu de Tal.