Un añu más cúmplese esti prestosu ritual que ye la cellebración del Día de les Lletres Asturianes, actu institucional entamáu pola Academia de la Llingua pa dar acoyida a los nuevos/es miembros (si ye que los hubiere) y dar cuenta, por boca de la so Presidenta, de los avatares del añu trescurríu nos aspeutos socio-llingüísticos.
Esti añu hubo delles novedaes en cuantes al protocolu a utilizar, anque nel fondu la cosa caltuvo los mesmos raigaños d’otros años. Los académicos tuvimos qu’ensayar una nueva entrada nel escenariu, lo que ficimos con seriedá, a nun ser dalgunes rises que se nos escaparon en dellos momentos. Llueu, yá nel actu, la cosa salió bien: naide cayó peles escaleres del escenariu, nin se confundió de sitiu. En fin…
Los discursos tuvieron mui bien, tanto los de les nueves académiques –Carmen Muñiz y Cristina Valdés- como l’avezáu de la “Presi”, Ana Cano, que nun tuvo en cuenta los munchos políticos asistentes al teatru y dio bastante “caña” a la falta d’enfotu políticu pa sacar esto alantre. Creo que’l discursu anda pela rede, asina que ná más voi dicir, sicasí l’emocionante recuerdu pal collaciu y amigu fallecíu, Miguel Ramos, qu’a toos nos punxo un ñudu nel gargüelu.
Yá se diz nos “medios” qu’asistió l’alcalde d’Uviéu, señor Caunedo, lo que ye d’agradecer, asina como otros ilustres
miembros del mundo políticu, tanto del PP, como de Foro ya Izquierda Xunida (d’estos cuasi tolos representantes parllamentarios). Y del PSOE destacar la notabilísima ausencia, un añu más, de la Conseyera de Cultura, doña Ana González, que nun se dignó apaecer nel actu más importante de les lletres asturianes. Munchu cuentu pela radio, pero cuando hai que facer actu de presencia, a la hora la verdá, desapaecía en combate, perdía, quiciás, na inauguración d’un campeonatu de chapes o de tiru con gomeru. Ye mui poco serio y un despreciu pa la llingua, l’Academia, los falantes y los escribientes.
Pero, al marxe d’autoridaes que van y vienen y nun se detienen, prestóme ver a xente muncho más importante, como a Sonia, la madre de Igor Medio. A Marisa, la muyer de Miguel Ramos cola que m’abracé emocionáu. A Lali, la hermana del siempre lloráu Andresín Solar… Elles sí que son les verdaeres “autoridades” que queremos ver siempres perellí. Tamién saludar a vieyos amigos, esti añu, por exemplu, a Xulio Llaneza, un de los fundadores del míticu Conceyu de Madrid (falamos del añu 1976) xunto con Pin, Roberto y dalgunos más. En fin, un actu mui prestosu, seguíu d’una espicha onde pudimos “repostar” de tantes emociones. Y agora a pol XXXVI Día de les Lletres. Vamos tener qu’estudiar más Llatín pa saber lleer el númberu que correspuende.
